Уллу борчланы салып тамамлагъанла

Элбрус районда грек-рим тутушуу спортну эм айныгъан тюрлюсюдю десек, жангыллыкъ тюйюлбюз. Сабийле, жаш тёлю да аны айырып сайлайдыла. Районда классикалы тутушууну тарыхы 55 жыл мындан алгъа башланады, ол кезиуде 1966 жылда Тырныауузну халкъ билим бериу шахар бёлюмюнде спорт школ ачылгъан эди. Къошакъ билим бериуню жангы учреждениясы сабийлеге кюч-къарыу алдырыу, саулукъларын кючлеу, аланы араларында спортха фахмулары болгъанланы ачыкълау жумушну тири тамамлап тебирегенди.

Спорт школ хар заманда да кесине уллу борчланы салгъанды, бийик жетишимлеге жетген гёжефлени хазырлай, аланы толтургъан да этгенди. Кёп айтхылыкъ спортчула жолларын мында башлагъандыла, ол санда Олимпиада оюнланы призёру Заур Курамагомедов да. Аны юйретген Локияланы Юрий бюгюнлюкде учрежденияны директоруду, анга «Россейни сыйлы тренери» сыйлы ат да берилгенди. Тренерле Этезланы Хусейин, Бапыналаны Шакъман, Чеченланы Артур, Ачабайланы Музафар, Ёзденланы Аскер, Хапаланы Аслан, Балаланы Алим эм башхала ишлерине сакъ болгъанларыны хайырындан школдан спортну кёп устасы чыкъгъанды. Жыл сайын быллай бийик ат 2-3 спортчугъа бериледи, бюгюнлюкде аланы саны 60-ха жетгенди.

Иш къыстау баргъанын а дагъыда бир шарт кёргюзтеди, талай жыл мындан алгъа Грозныйде Россейни чемпионаты къуралгъанды, анга Тырныаууздан 5 гёжеф къатышхандыла. Элбрус райондан спортчула Россейни башха-башха жыл санда жыйымдыкъ командаларына дайым киргенлери уа анга дагъыда бир шагъатлыкъды.

Арт кезиуде хорламлары бла Локияланы Жамболат къууандыргъанлай турады. Къатышхан эришиулеринде ол алчы жерлеге чыкъмай къалмайды, былтыр а къыралны чемпиону да болгъанды, Россейни бла дунияны кубокларында да хорлагъанды. Локияланы Мурат да даражалы турнирледе саугъа жерлеге чыгъады. Гёжефлени жаш тёлюлеринде Аслан Толов, Бийчеккуланы Даулет, Чеченланы Амаль, Лукияланы Руслан эм башхалары белгилидиле.

Школну бошагъанла къыралны билим бериу учрежденияларында усталыкъларын ёсдюредиле. Аланы орунларына уа жыл сайын гёжефлени жангы тёлюлери келедиле, аланы асламысы республикалы, регионла аралы эришиуледе да хорлайдыла. Мектепни бёлюмлери Кёнделенде бла Быллымда ачылгъандыла. Саулай да грек-рим тутушуу бла бюгюнлюкде анда 250-ге жууукъ адам кюрешеди.