Жумушла тынгылы тамамландыла

      КъМР-ни Парламентини Председатели Татьяна Егорова законла чыгъаргъан органны президиумуну кенгешин бардыргъанды. Алай бла «правительстволу сагъатны» чеклеринде жыйылгъанла регионну экономиканы айнытыу министри Рахайланы Борисни «Къырал эм муниципал услугаланы тапдырыу жаны бла» докладына тынгылагъандыла.

    Бюгюнлюкде республикада жашагъанлагъа мингден артыкъ къырал эм муниципал жумушла тапдырыладыла. Аладан 500-сю Госуслуги порталны болушлугъу бла бериледиле. Жумушланы 160 тюрлюсюн - толтуруучу эм муниципал органла, къалгъан 350 жумуш а МФЦ-лада тамамланадыла.

   Министр билдиргеннге кёре, КъМР-ни Правительствосу энчи эс социал магъаналы жумушланы толтуруугъа бёледи.  Алай бла быйыл сентябрьде аллай 93 жумушдан тизме къабыл этилгенди.

  Толтуруучу власть органланы бла жер-жерли самоуправление органланы ишчи жерлерин РФ-ни Цифралы айнытыу, связь эм асламлы коммуникацияла министерствосуну сервислерини платформасына къошуу болгъанды.  Дагъыда ведомствола аралы документ жюрютюуню электрон халда ишлетиуге артыкъ эс бёлюннгенди. Алай бла сентябрьге аллай жумушланы саны 2,5 миллионнга жетгенди.

    Докладчы билдиргеннге кёре, бюгюнлюкде республикада МФЦ-ны 12 бёлюмю ишлейди. Алада 245 «терезе» барды. Дагъыда 149-су удаленный халда эллилени жумушларын жалчытадыла. «МФЦ для бизнеса» деген эки бёлюм а «Россельхозбанкны» Къабарты-Малкъардагъы филиалында эм «Банк Нальчик» банкда хайырлы ишлейдиле. 2012 жылда МФЦ-ны биринчи офиси ачылгъанлы тапдырылгъан жумушланы саны 4,5 миллионнга жетгенди. Жети миллион адамдан а обращение болгъанды.

    «Мени документлерим» деген аралада адамла 350 тюрлю къырал эм муниципал услугаланы табаргъа боллукъдула. Тинтиулени кезиуюнде ачыкъ болгъанына кёре, МФЦ-ны ишлерине гражданланы 98 проценти ыразыдыла. Дагъыда бизни регион жумушланы электрон халда толтуруу жаны бла СКФО-да биринчи жерде болгъанын министр чертип айтханды. Докладын бошай, ол кюн сайын бу жетишимлени игилендириу жаны бла иш тохтаусуз бардырылгъанын билдиргенди.

    Ызы бла Татьяна Егорова министрге бир ненча соруу бергенди. Аладан бири жумушулары бла келген гражданлагъа кеси кезиулерин сакълап къаллай бир сюелирге тюшгени бла байламлы болгъанды. Анга жууап бере, Рахайланы Борис бюгюнлюкде гражданлагъа очередьде 15 минутдан аслам турургъа тюшмегенин айтханды. Жаланда бир тюрлю сакъланмагъан болум чыгъып къалса, ол кезиуде бир кесек кечигирге боладыла.

   Дагъыда Татьяна Борисовна, ЕСИА-да регистрацияны ётгенлени саны иги да кёп болгъанын эслеп,  гражданланы толусунлай ол низамгъа ётдюрюр мурат болгъанын бла къалгъанын соргъанды.

   КъМР-ни Парламентини Билим бериу, илму эм жаш тёлюню ишлери жаны бла депутаты Нина Емузова МФЦ-ны тийресинде машинала кёп нек жыйылгъанларын сурагъанды.

- Ол алайгъа жыйылгъанла электрон халда регистрацияны ётмеген 8 процентмидиле?- деп соргъанды Нина Гузеровна.

  МФЦ-ны таматасы Аслан Афаунов айтханнга кёре, ол болум асламында биринчи регистрация этиу бла байламлы болады.

   Депутатла дагъыда Госуслуги порталгъа кибератакаланы юсюнден, узакъ элледе «терезеле» ачыуну эм бир къауум справкаланы бериу бла байламлы чырмаулагъа эс бёлгендиле. Битеу айтылгъан затла бла байламлы эсгертиуле этилип, тийишли структуралагъа ашырылгъандыла. Парламентарийле кезиулю жыйылыуну 30 ноябрьде бардырыргъа деп тохташхандыла.

Жыйылыуну ахырында Промышленность, транспорт, связь эм жол мюлк жаны бла комитетни председатели Байдаланы Салих Парламентни президиумуну «Об обеспечении услуг связи по передаче данных и предоставлению доступа к сети Интернет на территории КБР» оноу бла шагъырей этгенди.

Поделиться: