Ана тилге аталгъан байрам

Ана тилим – жаным-тиним, мени дуниям!» фестиваль-конкурсну жыл сайын бардырыу эрттеден да ахшы тёреге айланнганды. Аны КъМР-ни Жарыкъландырыу, илму эмда жаш тёлюню ишлери жаны бла министерствосу къурап, юч ызда эришиуле бардырады: школланы, устазланы эмда сабийлени арасында.

Быйыл биринчи кере конкурсха мектепге дери билим берген бёлюмле да къошулгъандыла. Аны бла байламлы Элбрус посёлканы сабий садында да анга жораланнган байрам озгъанды. Аны хурметли къонакълары уа сагъынылгъан ведомствону, Элбрус районну билим бериу управлениясыны, администрациясыны да келечилери, бирси эллени садиклерини башчылары болгъандыла.

Эришиуню чеклеринде малкъар маданиятны, аш-сууну, жашау турмушну энчиликлерин ачыкълагъан кёрмючле къуралгъандыла. Мастер-классла, сахна оюнла, концерт да бардырылгъандыла. Конкурс ёсюп келген тёлюню юйретиуде энчи магъананы тутады. Анга уа жаланда педагогланы къаууму угъай, ата-анала да къатышханлары жамауат ана тилсиз къайсы халкъны да миллетлиги, кесилиги къалмазлыгъын ангылагъанын кёргюзтеди.

Сагъынылгъан министерствону бёлюмюню кенгешчиси Ахайланы Лариса  да, ахыр жыллада адамла кеслерини тин-ниет эмда культура хазналарына асламыракъ эс бура тебирегенлерин чертгенди. Фестивальгъа энди школгъа дери билим берген бёлюмле да, къатышып башлагъанлары уа, юйретиучюлеге кеслерини профессионал хазырлыкъларын ачыкъларгъа ахшы амалды.