Жюрек аурууладан сакъланырча - какао

        Адамны жашауун узун этиуде эм тромбладан сакъланыуда какао эм ахшы суусапладан бириди, деп билдириледи саулукъгъа хайырлы аш-азыкъны юсюнден индиялы Organic Facts деген сайтда.

         Какаогъа магний, медь бла железо киредиле. Алай диетологла эсгертгенлерича, ол жалгъан затла къошулмагъан продукт болургъа керекди, кесин да татлы этерге жарамайды.

         Алимле тохташдыргъаннга кёре, какао-порошок къошулгъан продуктланы хайырланыу къан басымны чёкдюрюрге болушады. Басымны мардагъа келтириуде ол къара неда жашил чайдан да кючлюрекди. Ол какао антиоксидантла бла да бай болгъаны бла байламлыды, ала оксидни азотун чыгъарыугъа себеплик этедиле, ол а къан тамырлагъа хайырлыды, деп жазылады клиника аш-азыкъны юсюнден америкалы журналда.

         Белгилисича, антиоксидантла эркин радикалланы хаталарын да  кетередиле. Какаода болгъан цинк а адамны чархын заранлы тюрлениуледен сакълайды, ала уа терк къартайыуну баш сылтауларындан биридиле. Анда тромбладан, инсультдан эм башха жюрек аурууладан сакълагъан флавоноидле да аслам тюбейдиле.

         Аны бла бирге алимле ол да мардадан озмаса, хайырлы болгъанын эсгертедиле.