Республиканы ара шахарында - аслам жангыртыу ишле

Къабарты-Малкъарны ара шахарыны орамларында тапландырыу ишле барадыла. Муниципалитетни жер-жерли администрациясындан билдиргенлерине кёре, ала «Къоркъуусуз эм тап автомашина жолла» миллет проектни чеклеринде тамамланадыла.

Бу кюнлеге Будай улу, Тырнаузская, Революционная, Свободы, Поперечная, Дагестанская, Пионерская, Мостовая, дагъыда Б. Хмельницкий, Фучик, Семашко, Карбышев, Канукоев атлы орамлада мадар этилип бошалгъанды. Аланы кёп къалмай барында да асфальт эмда тротуарла жангыртылгъандыла, чыракъла да орнатылгъандыла. Свободы орамда уа ишчиле эски суу быргъыланы да алышхандыла.

Тарчоков атлы, Театральный, Вольный Ауул бла баргъан Профсоюзная орамлада да жангыртыу ишле эбине жете турадыла. Мэрияда айтханларыча, алада хар не да бу айны ахырына хазыр боллукъду.

Шогенцуков атлы орамда тапландырыу ишле уа энтта да бошалмагъандыла. Анда жолну тюбю бла баргъан инженер коммуникацияланы жангыртырыкъдыла. Дагъыда жауун суула кетерча канализация къурарыкъдыла, тротуарлагъа уа плитка саллыкъдыла.

Жылны ахырына дери дагъыда Улбаш улу, Осипенко, Катханов, Ашуров, Дзержинский, Неделин, Ахметов, Клара Цеткин атлы, Тебердинская Керамическая, Ашамаз эмда Батраз орамла тап этилликдиле. Ленин эмда Къулий улу атлы проспектлени жангыртыу ишлеге хазырланыу да башланнганды. Алада жангы асфальт саллыкъдыла, тротуарларында уа плитка боллукъду. Орамла, ол санда адамла жаяу жюрюген жерле жангы чыракъла бла жарытыллыкъдыла. Бу ишлени келир жыл августха дери тамам этерге умут барды.

Энтта да бир жангыртыу ишле велосипедчилеге жолчукъ къурау бла байламлыдыла. Ол Канукоев атлы орамдан башлап, Малкъар орамгъа дери созуллукъду. Аны бла былтыр жарашдырылгъан аллай жолчукъгъа къошулуп, узунлугъу битеуда 6,5 километрден артыкъ боллукъду.

Нальчик шахар округда жолланы комплекс халда жангыртыу ишле Казбек Коковну буйругъуна тийишлиликде бардырыладыла, кеслери да Къабарты-Малкъар Республиканы 100-жыллыгъына аталадыла.