Жаяу жюрюгенлеге къоркъуу чыкъмазча

МВД-ны Черек районда бёлюмюню автоинспекторлары Къашхатауда къоркъуусузлукъ рейд бла бирге «Засветись» деген акцияны да бардыргъандыла. Аны кезиуюнде полициячыла водительлеге машинаны чыракъ жарыгъында иги кёрюннген аберилени юслеринден хапарлагъандыла эмда аллай затла юлешгендиле. Элледен неда шахарладан тышында жоллада кече тохтагъан водительлеге, жаяу жюрюгенлеге да аланы магъаналылыкъларын ангылатхандыла.

Жоллада жюрюуде жорукъланы (ПДД) 4.1 пунктунда айтылгъаннга кёре, «Кече неда иги жарыкъ болмагъан кезиуде жолну бирси жанына ётеме деген неда аны жаны бла бар адамны кийиминде чыракъ жарыкъда иги кёрюннген абериси болса игиди. Элледен неда шахарладан тышында жоллада уа аласыз болургъа чырт да жарамайды».

Акциягъа къатышханла бла ушакъ эте, автоинспекторла жаяу жюрюгенле къатышып жол-транспорт болумла асламысында кече болуучуларын   билдиргендиле. Аны себепли къарангы кезиуде, жорукъда айтылгъаныча, адамны юс кийиминде энчи белгилери болургъа тийишлидиле. Келе тургъан машинаны руль артында олтургъан инсан аны узакъдан окъуна эслерча, алай бла жаяу баргъаннга къоркъуу чыкъмазча.