Бузлатмазгъа игиди, саулукъгъа уа осалды

Къыш келип тебирегени бла водительле машиналарыны аллында мияласын жуууп тазалаучу, кеси да бузламаучу сууну сайлауну къайгъысын этип башлайдыла. Бу зат бузламазча анга кёп химия затла къошуп жарашдырадыла. Алай ала водительни саулугъуна хата салыргъа боллугъун а тергей болурламы? Специалистле айтханларына кёре, аллай сууланы законсуз чыгъарыучула аны метил спирт къошуп жарашдырыргъа боллукъдула. Ол мияланы бузламазына себеплик этеди, алай кеси уа бек къоркъуулу уугъа саналады. Да сора аны нек къошадыла десегиз а – ол этил неда башха спиртледен эсе учуз келеди да андан.

Метанолну бир чай къашыгъы адамны сокъур этерге боллукъду. Ол нервалагъа, ёпкелеге да хата салады. Андан къаннга жаланда жюз миллилитр, бир бирледе уа андан да аз тюшгени уа, адамны жашаууна окъуна къоркъуулуду. Аны бла ууланыу, биринчиден, аз-маз эсиртгенча алай белгили болады. Ызы бла адамны кёлю аман этеди, башы ауруп башлайды, кёзлери осал кёрюп тебирейдиле.  Артда уа адамны териси кёксюлдюм тюрсюнлю болуп, солууу да тыйылып башлайды. Ууланыу теренине кетсе уа, адам тунчугъуп ёледи.

Россей Федерацияда метанолну автотранспортха керекли затлада хайырланыугъа, ол къошулуп жарашдырылгъан затланы адамлагъа сатыугъа баш санитар врачны 2007 жылда 47-чи номерли буйругъу бла чек салыныпды, ол эсигизде болсун. Мияла жууучуну уа жаланда белгили жерледе сатып алыргъа кюрешигиз, кимден болса алмагъыз.

Дагъыда шешаны юсюндеги къагъытда не зат жазылгъанына эс буругъуз: ол къайда чыгъарылгъанына, предприятияны атына, тургъан жерине, продукцияны къурамына, ол къаллай мардалагъа келишгенине, хайырланыргъа жараулу болжалына эмда къоркъуусузлукъ жаны бла излемлерине. Быллай продукцияны жол жанларында законсуз сатылгъанын неда шешалада сагъынылгъан шартланы толусунлай басмаланмагъанларын эслесегиз а, аны юсюнден Роспотребнадзоргъа билдиригиз.