Республикада туризм айныйды

«Эльбрус» курортда жаз кезиуде солугъанланы саны жарым жылгъа 176 мингнге жетгенди. Ол а былтыр бла тенглешдиргенде, эки кереге кёпдю. «Шимал Кавказны курортлары» акционер обществону  билдиргенине кёре, «Эльбрус», «Архыз» эм «Ведучи» курортлада 1 майдан 31 октябрьге дери 300 минг адам солугъанды.

Битеу да 9 айны ичинде Къабарты-Малкъарда 840 минг турист болгъандыла. 2020 жылны кёрюмдюлеринден ол эки кереге асламды. Прогнозлагъа кёре ол тарих жылны ахырына бир миллионнга жетерикди.

Къабарты-Малкъар, арт жылланы излемлерине кёре, кесини курорт комплексини битеусезонлу халын къайтара турады. «КСК» акционер обществону таматасы Хасан Тимижев чертгеннге кёре, «туристле канат жоллары бла курортланы жаланда тау лыжа бла байламлы этмей, ары жылны не заманында да келип солурча объектлегеча къарайдыла».

- Биз да кеси жаныбыздан курортлада жаз кезиуде да сервис болуруна энчи эс бёлебиз. Коронавирус бла байламлы тюрлю-тюрлю фестивальла бардырыула бек аз болгъандыла. Алай таза хауада солурча, табийгъат бла танышырча онгла уа сакъланнгандыла. Асламлы информация органла курортланы къыш кезиуде онгларыны юслеринден кёбюрек жазаргъа ёчдюле. Болсада, жаз кезиуде да адамла алада солуй, зауукълукъ тапханлары сёзсюздю, - дегенди ол.

Минги тауну тийресинде солууну энчилиги лыжалада учууну таугъа чыгъыу бла бирге бардырыу онг болгъанындады. Курорт лыжа сезонну июльну ахырында жапхан эди. Ол кезиуде мында Россейни тау-лыжа спортдан жыйымдыкъ командасы да жараула ётдюргенди. Андан сора уа «Alpindustria Elbrus Race» деген тёрели эришиу бардырылгъанды. Дагъыда августда «Таза тау» деген экологиялы акцияны кезиуюнде Минги тауда 10 кубометр кир-кипчик жыйылып, тюшюрюлгенди.

 Андан тышында да, республикада туризмни жангы тюрлюлери да кенг айнып тебирегендиле. Миллет азыкъла, маданият энчиликле бла байламлы, саулукъ кючлеу жаны бла да солуу тышындан келгенлеге бек сейирди. «Нальчик» курортну кючю да айныйды дерге боллукъбуз. Алай бла коллектив бла солуу тёре жангыдан къайтарыла келеди. Анга деп бёлюннген 18 жер болуучу эсе, бюгюнлюкде ол 200-ге жетгенди. Быйылны 9 айында туризмден тюшген файда 6 миллиард сом болгъанды.

«Шимал Кавказны курортлары» акционер обществодан билдиргенлерине кёре, жангы сезоннга «Эльбрус» курорт хазырды. Битеу канат жолланы тинтгендиле эм болгъан кемчиликле кетерилгендиле.

Эсигизге салайыкъ, октябрьде КъМР-ни Башчысы Казбек Коков Элбрус районда иш бла байламлы болгъанында, турист инфраструктураны хазырлыгъын да тинтгенди. Районну башчысыны къуллугъун толтургъан Сотталаны Къурман эм «Шимал Кавказны курортлары» акционер обществону таматасыны орунбасары Беккаланы Хыйса бла бирге Казбек Валерьевич жангы парковка жерлени эм жаяу жолчукъланы туристлени къоркъуусузлукъларын жалчытыугъа къалай келишгенлерин тинтгенди.