Миллет энчилигибизни белгилейик

Тамбла Россейде Халкъны бирлигини кюню белгиленирикди. Анга жораланнган тюрлю-тюрлю акцияла бла флешмобла бюгюнлюкде онлайн халда бардырыладыла. Аладан бир къауумун Россейни школчуларыны къымылдауу (РДШ) да ётдюреди.

Аны Къабарты-Малкъардагъы бёлюмю бу жумушдан бир жанында къалмай юч тюрлю акцияны да кесини Инстаграм социальный сетьде аккаунтунда @rdsh_kbr бардырады. Алай бла ол акцияла миллет оюнланы, ашарыкъланы кёргюзтюрге эмда бирликни юсюнден окъуучуланы араларында викториналагъа къатышыргъа боллукъдула.

Бу жумушла 29 октярьде башланнгандыла. Алагъа энтта да къатышыр онг барды. Ата-аналадан да бу ишге тири къатышыу керекди. Сёз ючюн, къыз сабийле бла миллет ашарыкъларыбызны тамамлап жарашдырыр онг барды. Жашчыкъла бла уа ашыкъ оюнну, алан билекни ётдюрюрге боллукъду. Ызы бла ол видеороликлени РДШ-ны аккаунтунда кёргюзтюлген хэштеглени салып басмаларгъа керекди. Аланы юслери бла республиканы къонакъбайлыгъы эм миллет энчилигибиз ачыкъланырыкъдыла.  

Акция 4 ноярьге дери (23 сагъат 59 мин.) бардырыллыкъды.

Таппасханланы Аминат.
Поделиться: