Халкъны санын жазыуну электрон халда ётерге

Озгъан айны онбешинчисинде Битеуроссей халкъны санын жазыу бардырылып башланнганды. Бу жол аны «Госуслуги» сайтха да кирип ётерге боллукъду, дегендиле КъМР-ни Экономиканы айнытыу министерствосунда.

Кёп болмай а республиканы Правительствосуну башчысы Мусукланы Алий Нальчикде МФЦ-гъа барып, гражданла электрон переписьни ётерча анда къаллай онгла къуралгъанына къарагъанды. Мусук улу араны иши бла шагъырейленнгенди, тыш къыраллы паспортну жангы тюрлюсюн жарашдырыргъа жараулу Криптобиокабинаны ишлегенине да эс бургъанды.

МФЦ-ны башчысы Аслан Афаунов араны быйылгъы ишини юсюнден хапарлагъанды: «Быллай учрежденияла бир кюнню ичинде тёрт минг чакълы заявлениягъа къарайдыла. Ала бары да къырал эмда муниципал жумушланы бериу бла байламлыдыла. Ол санда кадастр эсепге салыугъа, жеринден тепдирилмеген мюлкню регистрациясын этиуге, энчи кабинетни хайырланыугъа сурам уллуракъды».

Учрежденияда переписьни онлайн халда ётерча онгла бардыла. Аны Госуслуги порталгъа кирип неда тийишли специалист болушуп тамамларгъа боллукъду. Бу порталда регистрация этерча паспорт бла СНИЛС болургъа керекди эмда хуржун телефонну номерин айтыргъа.

Мусукланы Алий МФЦ-гъа келгенле бла ушакъ этгенди, жазыуну быллай халда ётгенде къаллай жарсыула болгъанын да соргъанды. Биреу аны ёте тургъанын кёрюп: «Кесигизни юсюгюзден абери билдиреме деп жарсымагъыз. Бу жумушну тамамлагъанла биз, барыбыз да, ол неда бу категория гражданлагъа себеплик этген социал программаланы жарашдырыргъа болушабыз. Сёз ючюн, ишсизле толтургъан анкетала урунуу рынокну тинтирге, жангы ишчи жерле ачаргъа себеплик этедиле. Сабийлени саныны юсюнден информация уа школланы, садиклени, башха сабий учрежденияланы къурулушу бла байламлы умутланы тийишдирирге онг береди. Жашау журтланы юсюнден хар не да ачыкъ болса, жашау болумлары иги болгъан гражданланы санын тергерге боллукъду», - дегенди Правительствону Председатели.

КъМР-де Къырал статистика бёлюмню билдириуюне кёре, 29 октябрьге переписьни 493 минг адам ётгенди. Ол санда 67 мингден асламысы – электрон халда. Бу иш 14 ноябрьге дери бардырыллыкъды.

Ахырында Мусукланы Алий: «Перепись къагъытны онлайн халда толтурургъа онбеш минут керекди. Келир он жылны ичинде къыралыбыз, республика да къалай айнырыкълары анга кёре боллукъду. Бу ишге къатышыргъа чакъырама барыгъызны да. Бизге хар инсан да магъаналыды», - деп чертгенди.