Кавказны ёхтемлиги

Закий Къайсын бла байламлы жангы шартла излей интернетге киргенимде, кёзюме жюрекни къууандыргъан бир басма илиннгенди. Къулий улуну бу сиз кёрген суратыны юсюнде жазыу, аны жашау эм чыгъармачылыкъ жолун ачыкълагъан презентация, миллетибизни атын айтдыргъан шайыр Кавказдан, Москвадан да узакъ жерледе белгили болгъанына, энтта да бир шартдыла.

Суратда, сиз кёргенден, Лорино элни школуну аты жазылады. Ол къайда болгъанын билирге сюйюп, тинтип башладым. Бу эл Чукоткада орналады. Андагъы орта мектепни орус тилден бла литературадан устазы Светлана Ильинична Кумышева бизни Къулий Къайсын бла сохталарын шагъырей этгенди.

Сёзсюз, Чегем ауузунда туугъан закий СССР-ни заманында жашагъанладан бек фахмулуладан бири болгъанды. Аны кёп назмуларына жырла да такъгъандыла белгили композиторла.

Эстраданы жулдузлары уа сыйлы концертледе аланы айтхандыла. Узакъ Чукоткада жашагъан устаз да, баям, кеси заманында Къулий улуну деменгилигин билген, чыгъармалары бла къаршы шагъырей болгъан адамды. Чынтты литераторланы бла поэтлени сыйлагъан педагог а не заманда да сыйда болгъанды.

Презентацияда поэтни аскер жолу, миллетини кёчгюнчюлюк сынагъаныны юсюнден да тынгылы айтылады. Поэт халкъындан айырылып жашаргъа сюймегенине да бийик багъа бериледи.
«Кавказны ёхтемлиги» деген атны да Светлана Ильинична жарашдыргъан презентациясына бошдан бермегени хакъды.