Жарыкъ, мудах да сагъышла жашагъан поэзия тизгинле

Бу кюнледе Тырныауузда «Эдем» атлы поэзия кафеде Алибекланы Мустафаны къызы Моллаланы Заретаны «Быть собой» деген аты бла чыкъгъан жангы китабы бла окъуучуланы шагъырей этиу тюбешиу баргъанды.

Авторну юсюнден. Ол ата журтундан узакъда туугъанды. Заретаны анасы Гудиева Анна Георгиевна осетинли эди. Атасы уа – таулу. Ала уруш аллы жыллада Москвада Бийик партия школда бирге окъугъандыла. Андан къайтханлай, бир юйюр къурагъандыла. Таулуланы кёчюргенде, мында къалыргъа онгу бола тургъанлай, бирси ахшы келинлерибизча, Анна Георгиевна да бар малкъар халкъы сынагъан къыйынлыкъны сынагъанды. Ала Ташкент областьны Ховас районуну Бояут элине тюшгендиле. Биз китабыны къууанчына жыйылгъан къыз да анда туугъанды.
Малкъар халкъ ата журтуна къайтханда, Заретаны юйюрю Барамтада (Вольный аул) тохтагъанды. Ол анда школну бошап, педагогика училещеге кирип, школгъа дери сабийлени юйретиучю усталыкъны алгъанды. 1974 жылда урунуу жолун Нальчикни сабий садларындан биринде башлагъанды. Бир кесекден а жашауун бахсанчы жаш Моллаланы Магомет бла байлап, Тырныауузгъа кёчгенди. Анда школгъа дери билим бериу системада быйылгъа дери ишлегенди.

Къыркъ жылны ичинде ол сабийлени юйртиучюден районну окъуу-билим жаны бла инспекциясыны сабий садланы ишлерине къарагъан инспекторуна дери ёсгенди. Москваны къырал педагогика университетинде школгъа дери билим алыуда пелагогика бла психология бёлюмледе окъугъанды. Аны бек уллу жетишимине уа «Энчи сабий» деген социал-билим бериу проект ресурс саналады. Ол проект бла Зарета сау оналты жылны ичинде кюрешгенди. Ол ресурс арада саулукъларында аутизм халлы заранлары болгъан сабийлеге деп адаптив къауум къуралгъанды.
Зарета Мустафаевна искусствону адамыды дейдиле бары да аны таныгъанла – ол музыка инструментлени бир ненчасында согъады, назмула, музыка жазады.

Ол кюн Тырныауузда аны жангы китабы чыкъгъанына аталгъан презентациягъа Заретаны узакъда, жууукъдагъы шуёхлары да жыйылгъандыла. Баям, пандемияны къыйын заманлары болмасала, ала андан да кёп боллукъ эдиле. Къууанчлы ингирни ишин малкъар назмучу Ахматланы Люба, жырчы, педагог, Шимал Кавказны къырал искусствола институтун бошагъан актриса Байсолтанланы Индира бла бешинчи номерли гимназияны устазы Боранов Даут бардыргъандыла.

Элбрус районну администрациясыны таматасыны биринчи орунбасары Улимбашланы Арслан, Зарета Мустафаевнаны жангы китабы чыкъгъаны бла алгъышлап, аны окъуу системада этген жетишимлерине, ол районну бу жаны бла айныууна къошхан юлюшюне администрация уллу магъана бергенин айтханды.

Школ устазла, ингирни элтгенле кезиу-кезиу Зарета Мустафаевнаны назмуларын окъугъандыла, алада болгъан философия магъананы жашауда кеслери кёргенлерине, алай а ол затланы айтыргъа Аллах жамауатда, ма бу назмучу къызча,  фахмулу адамланы сайлагъанын белгилегендиле.

Элбрус районда Билим бериу управленияны таматасы Атаккуланы Нюржан Зарета бла кёп жылла бирлешип, бир бирни ангылап ишлегенлерин, аны адамлыгъы билимине келишгенин да айтханды. Ол Зарета «Энчи сабий» деген ресурс проекти бла аутизмден къыйналгъан сабийлени жашаугъа келишдирирча энчи онгланы къурагъанын, алагъа деп ол энчи программа-методика къурап, ол сабийлеге, ата-аналагъа да къаллай бир болушлукъ этгенин белгилегенди эм педагог, назмучу шуёхуна саулукълу узакъ ёмюр тежегенди.

Горонону библиотека системада методисти Энейланы Фатима да Зарета Мустафаевна ызындан келген тёлюге юлгю болгъанын чертип, аны назмуларында тиширыу жылыулукъ, жарыкъ да, мудах да оюмла тапханын айтханды.

Жазыучу, белгили журналист Османланы Хыйса Моллаланы Заретагъа кесини малкъар, осетин, орус тилде да чыкъгъан китабын бергенди саугъагъа. Къабарты-Малкъарны Журналистле союзуну предеседатели Шауаланы Разият а, Заретаны союзну правленини членине алгъанларын билдирип, анга аны шагъатлыкъ къагъытын бергенди.

Мусукаланы Сакинат Зарета бла аны ол юйюрню энчи шуёху композитор Жеттеланы Мустафир танышдыргъанын, андан арысында ала шуёхлукъ жюрютгенлерин айтханды. Сора китапда назмучу къыз таймай ушакъ этген, дуниясын алышхан жашау нёгери Моллаланы Магометни эсгергенди. Аланы къонакъ кёп жокълагъан юйлеринде жылыу тапханла кёп болгъанларын да айтханды.
Тюбешиуню ахырында тукъумну атындан Моллаланы Сулейман сёлешгенди. Ол аланы келинлерини хурметин этип, ары жыйылгъанлагъа ыразылыгъын айтып, къайда айлансала да, юйлерине бары да сау-саламат жыйылсынла деп, халкъыбызны ариу алгъышын тежегенди.

Кертиланы Сакинат.
Поделиться: