Туризм бёлюм эм къонакъ алыу жаны бла соруулагъа энчи эс бурулгъанды

Къабарты-Малкъарны Башчысы Казбек Коков эм Ростуризмни таматасы Зарина Догузова республиканы турист бёлюмюню келечилери бла жолукъгъандыла. Тюбешиу «Азимут» къонакъ юйню майданында къуралгъанды эм анга гостиничный, экскурсионный, ресторан бизнесни, ассоциацияланы, профессионал биригиулени келечилери жыйылгъандыла. Тюбешиуге КъМР-ни курортла эм туризм министри Мурат Шогенцуков, Нальчик шахар округну жер-жерли администрациясыны таматасы Таймураз Ахохов да къошулгъандыла.

Жыйылыу «Федерал магъаналы Нальчик курортну тийресин айнытыуну мастер-планы» инвестиция проектни презентациясындан башланнганды. Аны бла Таймураз Ахохов шагъырейлендиргенди. Ол Нальчикни инвестициялы амалларын жаланда бальнеология къолайлыгъы болгъан шахарныча угъай, республиканы сурам болгъан рекреация бёлегине жууукъ тийренича эм кесини турист къолайлыгъы болгъан жернича белгилегенди. Нальчикни курорт тийресин айнытыу программа санатор-курорт объектле бла байламлыды, тийрелени планировкасы бирикдирилген концепциягъа кёре этиледи.

Нальчикде жангы шёндюгюлю кезиуге келишген къонакъ юйлени ишлеу жаны бла уллу инвестициялы проектле кёргюзтюлгендиле, аланы туристлени асламысын сыйындырырча кючлери боллукъду. Сёз Шогенцукова-Лермонтова орамланы мюйюшюнде орналгъан Турист юйню инвестор бусагъатдагъы комплексге тюрлендирлигини юсюнденди. Мекямны тарыхлы сыфаты сакъланырыкъды, инвестор 120 жерге къонакъ юй комплексни эки жылны ичинде ачар муратлыды.  Экинчи гостиница комплекс къурала турады: алгъыннгы полиграфкомбинатны шёндюгюлю къонакъ юйге тюрлендирилгени 2022 жылгъа белгиленипди. Проект республиканы ара проспектини архитектура кёрюмдюсюне тийишлисича келишдирилликди, аны бла бирге миллет энчилик сыфатла сакъланырыкъдыла.

Туризм бёлюмню эм къонакъ алыу индустрияны келечилери бла андан ары ушакъда Зарина Догузова  жыйылгъанланы жарсытхан кёп соруулагъа жууапла бергенди.  Ол турист бизнесни льготалы кредитованиясыны экинчи урумуну юсюнден соруугъа ыразылыкъ болгъанын билдирип жууаплагъанды, аны биринчи уруму 30 сентябрьде бошалгъанын, экинчи уруму уа быйыл неда эндиги жылны аллында белгили боллугъун чертгенди. Къонакъ алыуда жетишимлиликни баш ышанларындан бирлерине Зарина Догузова адамлагъа сюймекликни, къонакълагъа ышара билиуню, шуёхлукъ сезим болгъанны кёргюзте билиуню санагъанды.

Тюбешиуню ахырында Зарина Догузова Къабарты-Малкъарны юсюнден жылыулу сёзле айтханды: «Мында аламат табийгъат бальнеология эм турист онгла бла келишдирилипди. Бай миллет хазна миллет энчиликле бла бирге сейир болумланы къурайдыла».

Казбек Коков Ростуризмни таматасы Зарина Догузовагъа туризмни айнытыу соруулагъа, Къабарты-Малкъарда бардырылгъан проектлеге билеклик этгени ючюн ыразылыгъын билдиргенди. «Туризм бёлюм бизге бек магъаналыды, республиканы къолайлыгъы уллуду. Ростуризмни башламчылыгъы болгъан проектлени жашаугъа кийирииу бу бёлюмню айнытыуда жангы атлам боллукъду», - деп эсеплегенди Къабарты-Малкъарны Башчысы.