Жюрекледе сакъланырыкъ такъыйкъала

Бабугентде Деппуланы Хаким атлы 2-чи номерли кадет школда жангы окъуу жылны ал кюнлери сейир тюбешиуден башланнгандыла. Кёп болмагъанлай кадетлеге къонакъгъа РФ-ни халкъ художниги Герман Паштов келгенди. Аны биргесине РФ-ни Сауутланнган кючлерини запасдагъы офицерлерини «Мегапир» миллет ассоциациясыны КъМР-де бёлюмюню советини председатели Атайланы Жашарбек, «Мегапирни» советини келечиси Хачим Кунижев, Черек муниципал районну жер-жерли администрациясында Маданият управленияны таматасы Байсыланы Харун да болгъандыла.

Окъуучула келгенлеге жарыкъ тюбеп, белгили суратчыны жашау эм чыгъармачылыкъ жолларын билгенлерин туура этгендиле, жоралау назмула окъугъандыла эмда хор бла жырлагъандыла.

Ызы бла Герман Суфадинович сёлешгенди. Ол кесини уруш жыллагъа тюшген къыйын сабийлигини, окъуууну, чыгъармачылыгъыны юсюнден хапарлагъанды. Школубузгъа бир ненча китапны эм суратларын саугъалагъанды. Дагъыда ол ксилография амал бла сурат ишлеуден мастер-класс бардыргъанды.

Сабийле къонакъгъа сюйюп тынгылагъандыла, гравюраны хазырлаугъа къарагъандыла эм ол ишге кеслери да къатышхандыла. Тюзюнлей жарыкъ халда ушакълашыу тюбешиуге энчи къууат бергенди. Уста Лермонтовну кавказ темалы хапарларына кёре жазгъан суратларын, кеси да уллу шуёхлукъ жюрютген Къулийланы Къайсынны назму жыйымдыкъларына хазырлагъан иллюстрацияларын да кёргюзтгенди. Башха чыгъармаларыны тарыхларыны юсюнден да сейир хапарлагъанды.

Кадет школну директору Эристауланы Абдурахман а керти да бийик фахмулу инсан бла тюбешиу жаш тёлюню эсинде сакъланырыгъын белгилегени. Ахырында сабийле, абаданла да суратчыгъа соруула бергендиле, къол ызын салырын тилегендиле, жыйылып суратха тюшгендиле.