Нальчикде Шогенцуков орамны жангыртырыкъдыла

Тюнене республиканы ара шахарыны А.А. Шогенцуков атлы орамында «Къоркъуусузлу качестволу жолла» деген миллет проектни чеклеринде къурулуш ишле башланнгандыла.

 А.А. Шогенцуков атлы проспектни А. П. Кешоков атлы орамдан тебиреп, Осетинская орамгъа дери  асфальт алышынырыкъды, бордюрланы да кетерип, башхаларын саллыкъдыла, тротуарланы ариу этерикдиле, орамлада чыракъла жанарыкъдыла. Андан сора да эски болгъан инженер коммуникацияланы алышырыкъдыла, деп билдиргендиле газетге шахарны администрациясыны пресс-службасындан.

23 сентябрьден башлап 30 ноябрьге дери, А. А. Шогенцуков атлы проспектни А. П. Кешоков орамындан тебиреп, Ш. Б. Ногмов орамгъа жетгенлей, жол  жабылып боллукъду, автотранспорт жюрюрюк тюйюлдю.

Ремонт ишле бардырылгъан кезиуде, А. П. Кешоков орамны В. И. Ленин атлы орамдан тебиреп, А. А. Шогенцуков орамгъа дери машинала жюрюген бир жанлы болуп тургъан  чекни кетередиле. Башхача айтханда, энди автомашинала ары да  бери да эркин жюрюрюкдюле.

Андан сора да къурулуш ишле бардырылгъан кезиуде жамауат транспортну  -биринчи эм алтынчы номерли маршрут таксийлени  жюрюулеринде  тюрлениуле боллукъдула. Ала бла администрацияны сайтында болгъан материал бла шагъырейленирге боллукъду.

Дагъыда ремонт  ишле  бла байламлы башха жолла бла жюрюрге амал болмай, троллейбусланы бешинчи  эм  жетинчи номерлерини жюрюулери тохтатылады.

Энди тёртюнчю номерли «Дубки- Горная» маршрут бла жюрюген троллейбус Осетинская орам бла В. И. Ленин атлы ормагъа жетип, алайдан  А. П. Кешоков ормагъа, сора А. А. Шогенцуков орам бла жюрюучю жолуна чыгъарыкъды.

 Бизни корр.

Поделиться: