Эсепле чыгъарыу, ыспас этиу, саугъалау

Тиширыуланы Нальчик шахар совети жылны ичинде кёп ахшы  ишле  бардыргъанды. Жандауурлукъ акцияла, адабият ингирле,  аналаны, кёп сабийли юйюрлени,  урунууда жетишимле болдургъанланы хурметлеуге аталгъан байрамла, тюрлю-тюрлю конкурсла къурагъанды,  аллай  кёп башха  жумушла да тамамлагъанды. Аны юсюнден  былтырны эсеплерин чыгъарыугъа аталгъан жыйылыуда айтылгъанды. Ары советни ишине себеплик этгенле да чакъырылгъандыла. Аланы араларында уа врачла, устазла,  алимле, жазыучула, журналистле, искусствону келечилери  да бар эдиле.

Алагъа  советни председатели Лидия Дигешева жюрек  ыразылыгъын билдиргенди.  "Сизни  себеплигигиз бла биз кёп огъурлу жумушланы толтурабыз, даражалы конкурслагъа къатышабыз,  алада жетишимле болдурабыз.  Бизни организация коммерциялы  болмагъан биригиулени  уставларына эмда программаларына тийишлиликде ишлегени ючюн  сертификат къоллу да болгъанды",-дегенди ол.      

Андан сора советни таматасы, тюбешиуге келгенлени хар бирини да атларын айтып ыспас этгенди, саугъагъа уа  шёндюгю авторланы  китапларын бергенди. Хурметге тийишли болгъанланы араларында  техника илмуланы доктору Жаболаны Аминат,   шахарыбызны айнытыугъа уллу къыйын салгъан Беппайланы Роза, КъМР-ни  культурасыны сыйлы къуллукъчусу  Моттайланы Светлана, Нальчикде эт комбинатны  профсоюз организациясына башчылыкъ этген Эбзеланы  Светлана,  РФ-ни Художниклерини союзуну члени  Акъкъызланы Имара,  машинала ишлеучю заводда юридический бёлюмге башчылыкъ этип тургъан  Баразланы Халимат, "Горянка" газетни бёлюмюню редактору Байсыланы Марзият,  дагъыда башхала  бардыла.

Сёзсюз, ингирде жырла, тепсеуле да болгъандыла.   РФ-ни, КъМР-ни да сыйлы артисткасы  Ирина Даурова эм аны  сохталары жыйылгъанланы эрикдирмей тургъандыла. Тиширыуланы тилеклерине кёре да кёп жыр айтхандыла.

Ахырында уа  Лидия Хазизовна 2019 жылда тамамланыллыкъ ишлени  юсюнден билдириу этгенди.

Холаланы Марзият.
Поделиться: