Больничный хакъ тенгли тёленирикди

Ауругъан сабийине къарар ючюн больничныйге чыкъгъан анагъа (атагъа) хакъы толусунлай тёленирикди. Закон кючюне 1 сентябрьде киргенди. Сёз 7 жылгъа дери балаланы юсюнден барады. Больничный  сабий стационарда, неда амбулаторияда багъылгъанына да къарай берилликди. Аны ёлчеми бир кюннге 2434 сомгъа жетеди.  

Инсанлагъа 2026 жылда 1 сентябрьге дери гаражлары орналгъан жерге хакъсыз иеликни тохташдырыргъа эркинлик берилгенди. Сёз 2004 жылда 30 декабрьге дери ишлетилген объектлени юсюнден барады. Бу амал бла къыралда 3,5 миллиондан аслам адам хайырланаллыкъдыла.

Законну башламчылары белгилегенлерича, гаражланы асламы совет заманлада ишленнгендиле. Ала  эсепге салынмагъанлары ючюн сатаргъа, сабийлеге къояргъа онг жокъду. Закон а бу праволу кемчиликни кетереди.

Россейде ахча оюнланы бирикдирилген регулятору къураллыкъды (ЕРАИ). Ол интернетде ахча оюнланы законсуз къурагъанланы ачыкълау бла кюреширикди. Дагъыда оюнланы къурагъанладан спорт федерациялагъа, спорт лигалагъа тёлеулени жыйышдырыу бла да кюреширикди.

Быйыл кюз артында интернетде дарманла сатхан аптекалагъа излемле да тюрленнгендиле. Алгъын бу иш бла, бек аздан, 10 аптекасы эм кесини сайты болгъан организациялагъа бардырыргъа эркин этилгенди. Энди уа аны бла аллай сети болмагъанла да кюрешаллыкъдыла.

Студентле бирден талай квалификация алаллыкъдыла. Вузлагъа окъутуу программаланы сайларгъа эркинлик берилгени бла энди университетле усталыкъланы къауумларына кёре хазырлаяллыкъдыла. Алай бла студентлени бир жолгъа талай квалификация алыргъа, экинчи курсдан сора башха факультетге кёчерге эркинликлери боллукъду.

Финанс организацияла инсанлагъа ишини юсюнден толу эм керти шартланы белгили этерге борчлу этилгендиле. Аны бла бирге, инсан бла къабыл кёрюлген келишимде болгъан битеу шартла, ол санда къоркъуулу болумла да, ачыкъ этилирге керекдиле. Закон кючюне 10 сентябрьде киргенди.

Сакъатлагъа электрон сертификатла. Саулукъларына кёре, чекленнген онглары болгъанлагъа реабилитация жаны бла техника керекле алыргъа электрон сертификатла берилликдиле. Алай бла реабилитациягъа керекли медицина техниканы не тюрлю тюкенде да сатып алыргъа боллукъду, ол санда интернетде.

Борчу болуп, аны тёлеуню юсюнден сюд приставла бегим чыгъаргъан кезиуде, ахча инсанны хакъындан тыйыллыкъды. 26 сентябрьде кючюне кирлик законнга тийишлиликде, энди иш бериучюле борчлары болгъан ишчилерини хакъларындан юч кюнню ичинде ахчаны приставланы депозит счётларына ашырыргъа керекдиле.