Къуллугъун артыгъы бла хайырланнганды

КъМР-де МВД-ны Следствие управлениясыны къуллукъчулары Чегем райондан 35-жыллыкъ тиширыугъа ачылгъан уголовный ишни тинтип бошагъандыла. Ол культура хазнаны эсгертмелерин къоруулау жаны бла къырал учрежденияны башчысыны къуллугъун толтургъанды алгъаракълада.

Ол РФ-ни УК-сыны 286-чы статьясыны 2-чи кесегине эмда 159-чу статьясыны 3-чю кесегине кёре терсленеди - къуллугъун артыгъы бла хайырланнганына эм хыйлачылыкъ этгенине ишеклик барды.

Тинтиуледен ачыкъланнганыча, 2019 жылда апрельден 2020 жылда апрельге дери кезиуде ол башчылыкъ этген учрежденияны тёрт ишчисине берилген премияларындан анга юлюш чыгъарырларын излегенди. Алай бла ол 48 минг сом къоллу болгъанды.

Андан сора да, 2019 жылда декабрьден 2020 жылда июльгъа дери тиширыу кесини къуллугъун хайырланып, 140 минг сом къоллу болгъанды. Бу жол а ол учрежденияны кереклерине ахча жокъду деген сылтау бла ишчилеге  тёленнген ахчаны артха къайтартханды.  

Уголовный ишни прокуратура къабыл кёргенди. Ол Нальчикни сюдюню къараууна берилгенди.