Ууну хатасын ангылатхандыла, аман къылыкълагъа къатышмазгъа чакъыргъандыла

Черек районну школучулары бла кадетлери «Ёлюм къайда сатылгъанын айт!» деген профилактика акциягъа къатышхандыла.

РФ-ни МВД-сыны Черек районда бёлюмюню акъылбалыкъ болмагъанланы ишлери жаны бла инспекторлары бёлюмде жамауат советни секретары Жаболаны Жабраил бла бирге Бабугентде 2-чи номерли кадет школда бла Чеченланы Шамиль атлы мектепде  болгъандыла.

Наркотиклеге къажау битеуроссей акцияны чеклеринде полициячыла жаш адамлагъа ууну адамны саулугъуна салгъан хатаны, аны сатханланы юсюнден шартланы право низамны сакълаучу органлагъа белгили этиуню магъанасыны юслеринден айтхандыла. Сёз саулукълу жашауну жорукъларыны, законну сакъларгъа, аманлыкъчыладан кери турургъа кереклисини юслеринден да баргъанды.

Эсигизге салайыкъ, «Ёлюм къайда сатылгъанын айт!» деген битеуроссей акцияны биринчи бёлюмю 11-22 мартда бардырылгъанды. Аны  чеклеринде наркотиклеге къажау управленияны полициячылары  профилактика мадарла толтурадыла. Бу иш жамауатны  ууну жайылыууна къажау ишге сейирлерин къозгъар, аны ичгенлени санын азайтыр, ауругъанлагъа багъыуну бла реабилитацияны амалларын ангылатыр мурат бла къуралады.

Болсада наркоманияны профилактикасы жаны бла мадарла къуру акцияны кезиуюнде толтурулмайдыла, ол наркополициячыланы харкюнлюк ишиди. Уу законсуз сатылгъанларыны юсюнден а «ышаныулукъну» телефон номерлерине сёлешип билдирирге боллукъду:

КъМР-де МВД: (8662) 49-50-62; (8662)40-49-10 (дежурный бёлюм)

РФ-ни ФСИН-ини КъМР-де управлениясы:   (8662)75-27-54; (8662)77-93-89

КъМР-ни Жарыкъландырыу, илму эм жаш тёлюню ишлери жаны бла министерство: (8662)42-28-23

«Наркодиспансер» саулукъ сакълау учреждение: (8662) 44-17-83

Билдириулеге барысына да жууапла берилликдиле.