Аныча адамгъа жашауда тюбеген уллу къууанчды

Бир жол эрттегили шуёхума тюбейме. Ушакъ эте келгенибизде, ол манга: «Билеме, сен кёплени юсюнден жазаса, махтайса. Ала керти да хурметге тийишли адамладыла. Аны ючюн сау бол, алай мени тилегими толтура, бизни биринчи устазыбызны юсюнден да жазсанг эди, бек ыразы этеригенг. Бу жаланда мени тилегим тюйюлдю, классыбызда окъугъан кёплени тилеклериди. Устазыбыз а Къарчаланы Шама Хакимовнады», - деп, аны юсюнден эки сагъатны ичинде тохтаусуз хапар айтып турду. Мен аны, башхаланы да тилеклерин толтура къаламымы къолгъа алгъанма. Шама Хакимовна тамата эгечим бла къоншуда кёп жылланы жашагъанлары себепли, бу тиширыуну кесим да  уста таныйма. Ол керти да адетли, намыслы, ариу тилли адамды. Шуёхуму хапарын басмалайма.

Алгъын буруннгулуланы урлугъуна кёре тирлиги деген айтыуларын эшитсем, ол жаланда иш бла байламлы суунуучу эдим. Алай аны магъаналылылыгъыны юсюнден сагъышха киргенимде, быллай сёзле адамланы араларында болумгъа кёре да айтылгъанларын ангылагъанма. Осал урлукъ сепсенг, тирлиги да анга кёре боллукъду. Сёзсюз, ала жашауунгда, ачы кёгетле кибик, бетинги жарыкъ этмезликлерине ишек жокъду. Алай адам кеси ачыкъ жюрекли, не кезиуде да болушлукъ этерге ашыкъгъан, хурметли болса уа, ол заманда ёз сабанында ёсдюрген тирликден ъайыр алыр.

Устазны усталыгъы жер жюзюнде бек буруннгуладан бириди. Аны иши хар адамны къадарында уллу жерни алады. Олду ариулукъгъа, игиликге юйретген. Бу шартла уа тёлюден-тёлюге ётюп барадыла.

Биринчи устазларыбыз экинчи ата-аналарыбыздыла. Бизге жашауну биринчи эмда магъаналы дерслерин бергендиле. Ала уа харфлагъа бла тарихлеге тюшюндюргенден сора да, таза ниетли болургъа, Ата журтунга, туугъан жеринге сюймекликге, кертичиликге, шуёхлукъгъа юйрете эдиле.

Насыпха, Хасанияны 16-чы номерли орта школунда ариу тилли, таза ниетли, огъурлу педагогла бек кёп эдиле. Биз, къызчыкъла, алача кийинирге, чачларыбызны алача жыяргъа, алача атларгъа окъуна да излей эдик. Аллай бир  сюйгенбиз устазыбызны. Аланы араларында уа Холаланы Якуб Хусейнович, Къарчаланы Шама Хакимовна, Герийланы Зухура Масхудовна, Чочайланы Алла Махмудовна, Теммоланы Лидия Таукаевна, Чочайланы Хусей Ибрагимович, дагъыда кёп башхала бар эдиле.

Бизни, школну къыркъ беш жыл мындан алгъа бошагъанланы, аланы юслеринден уллу хурмет бла кёп сагъатны ичинде айтып турургъа къолубуздан келликди. Ала бизни окъуугъа алландыргъандыла. Асламыбыз бийик билим алгъанбыз, бирер жерде ишлейбиз. Айтхан насийхат сёзлерин а бюгюн да унутмагъанбыз. Тутхан ишибизде жетишимли эсек, ол аланы хайырынданды. Аны ючюн алагъа узакъ ёмюр, ыспас да тежейбиз. Мен да устазлыкъны сайлагъанма.

Жашауумда ахшы устазларым бла насыбым тутханды. Биринчи устазым Къарчаланы Шама Хакимовна эди. Мен аны тюбеген кюнюбюзден башлап, анамдан кем сюймегенме. Анычала кёп тюйюлдюле. Бизге устаз болуп келгенинде ол жаш эди. Аны битеу классыбыз да сюйгенди, ол кеси эллибиз болгъаны себепли, битеу ата-аналарыбыз да аны таныгъандыла, сюйгендиле, хурмет этгендиле.

Биз школда окъугъан заманыбызда анга кимден да кёп гюлле берилиучю эди. Аны бетинден ышарыуу бир заманда да кетип кёрмегенбиз. Ол бизге ауазын кётюрюп да бир кере окъуна эшитмегенбиз. Дерсни уа къалай сейирлик ангылата эди ол. Аны бла бирге жюрегини жылыуун, ариулугъун, теренлигин, жашаууну насыбын да бере эди. Табийгъатны, жаныуарланы сюерге, ариулукъну кёре билирге да ол юйретгенди. Аны бла бирге башханы къайгъысына къайгъырыргъа, бир бирибизге болушургъа да.

Биринчи устазыбыз… Къаллай бир кёп ахшылыкъ этгенди ол бизге! Хар бирибизге жюрегинден юлюш этгенди. Сюйген устазыбызгъа бюгюнлюкде ыспас эте, ыразылыгъыбызны билдиребиз. Шама  Хакимовна, узакъ ёмюрлю, саулукълу болуп кёп жылланы жаша, бизге ниет анабыз. Жашауубузну ахыр кюнюне дери да сизни атыгъызны уллу хурмет бла эсгере турлукъбуз. Аныча адамланы жашауунгда тюбегенлери уллу къууанчды.

Шуёхум хапарын бошагъандан сора элли жыл мындан  алда школну бошап чыкъгъанла Аккыланы Баринаны, Балаланы Сакинатны, Бегийланы Фазиканы, Габоланы Зояны, Жангоразланы Аминатны, Къазийланы Зухураны, Ёлмезланы Аминатны, Ажоланы Назифаны, Холамханланы Римманы, дагъыда кёп башха окъуучуларыны атындан письмо да жазгъанларын, ала бары да къол салып, Шама Хакимовнагъа кёп огъурлу сёзле тежегенлерин да айтханды.

Холаланы Марзият хазырлагъанды.
Поделиться: