Терк медицина болушлукъ берген службагъа – жангы улоула

Тюнене республиканы терк медицина болушлукъ берген службасына 17 машина келтирилгенди. Нальчикде Келишиулюкню майданында аланы районланы ара больницаларыны келечилерине бериу бла байламлы къууанчлы жумуш болгъанды. Анга Къабарты-Малкъарны Башчысы Казбек Коков да къатышханды.  

Республиканы оноучусу техниканы онглары бла шагъырейленнгенди эмда районланы саулукъ сакълау учрежденияларыны келечилери бла ушакъ этгенди. Ол машинала РФ-ни Президентини Федерал Жыйылыугъа Посланиясында белгиленнген буйрукъланы чеклеринде келтирилгенлерин чертгенди. «Федерал араны болушлугъу бла халкъны жарсытхан сорууланы тамамларгъа къолдан келгенди. Бу машинала уа элледе саулукъ сакълау учреждениялагъа бёлюнедиле», - дегенди ол.

Бу магъаналы ишни юсюнден оюмун журналистлеге айта, ол Россейде саулукъ сакълауну айнытыугъа бурулгъан миллет проект субъектледе медицинаны, бек алгъа уа аны биринчи бёлюмлерин, тапландырыргъа себеплик этгенин чертгенди. «Ахыр жыллада саулукъ сакълау учрежденияланы ырысхы-техника базалары игилендириледиле. Коронавирус ауруу жайылгъан къыйын кезиуде Россейни Саулукъ сакълау министерствосу госпитальланы керекли оборудование бла жалчытыу жаны бла уллу ишни тамамлагъанды. Бюгюнлюкде уа битеу тийишли аппаратла бардыла, ол санда компьютер эм магнит-резонанс томографла, жангы рентген аппаратла.

Къысха айтханда, саулукъ сакълау учрежденияланы болумларын игилендириу, излемлеге келишдириу жаны бла тийишли жумушла тамамланадыла. Терк медицина болушлукъну юсюнден айтханда уа, аны транспорт базасы толусунлай жангыртылгъанды дерчады», - дегенди ол.   

Алай бла районланы ара больницаларына берилген «Газель-Next» машинала «Б» класслыдыла. Башхача айтханда, ала керекли оборудование бла бирге реанимация болушлукъ бергенде хайырланнган аппаратла, ол санда дефибриллятор, ёпкелени солутхан эм башхала бла да жалчытылыныпдыла.

КъМР-ни саулукъ сакълау министрини орунбасары Марат Кармовну бизге айтханына кёре, энчи эс эллени кереклерин жалчытыугъа бурулупду. «Ма бюгюн сиз кёрген машинала районлагъа бериледиле. Ол санда аладан бири Элбрусну участка больницасына бёлюнеди. Терк медицина болушлукъ бериу службаны транспорт базасын жангыртыу жумушла мындан ары да бардырыллыкъдыла», - дегенди ол бизге.

Элбрусну участка больницасыны таматасыны къуллугъун толтургъан Геккиланы Людмила бизге айтханыча уа, элге санитар транспорт берилгени артыкъда магъаналыды. «Коронавирус жайылгъан къыйын кезиуде машина хар кюн да керек болгъанды. Саусузланы Нальчикге келтирирге, башха жерлеге жетдирирге тюшгенди. Кюннге бир ненча кере элден тышына барыргъа керек эди, аны хатасындан а машинабыз осал болгъанды. Бюгюн бизге быллай жангы техника берилгени ючюн республиканы оноучуларына ыразылыгъымы айтыргъа сюеме», - дегенди Людмила Махмудовна.