КъМР- ни Башчысы Казбек Коков «муниципал сагъатны» бардыргъанды

КъМР-ни Башчысы Казбек Коков «муниципал сагъатны» бардыргъанды, анга КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы   Мухамед Кодзоков, КъМР-ни жарыкъландырыу, илму эм жаш тёлюню ишлери жаны бла министри  Анзор Езаов,  КъМР-ни айырыу комиссиясыны председатели   Вячеслав Гешев эм муниципал къуралыуланы администрацияларыны башчылары къатышхандыла.

Жыйылыуда вакцинация къалай баргъаны, миллет проектлени бу кезиуге белгиленнген кёрюмдюлери эм  17,18,19 сентябрьде  Къырал Думагъа депутатланы сайлау бла байламлы бардырыллыкъ айырыулагъа хазырлыкъны юсюнден соруула сюзюлгендиле.

Бюгюнлюкде республикада коронавирус инфекциягъа къажау 164 минг адам дарман салдыргъандыла, аладан толусунлай эки кезиуню да 130 минги ётгенди. КъМР-ни Башчысы белгилегеннге кёре, шёндю ауругъанланы эм госпиальлагъа тюшгенлени саны бир кесекге азая башлагъанды, ол профилактика ишлени бардырыу бла, ол санда халкъгъа иммунизация этиу бла байламлыды. Башчы жыйылыугъа къатышханланы ол жаны бла иш мындан арысында да бардырылыргъа кереклисин эслерине салгъанды. 

Россей Федерацияда регионланы айнытыу бла байламлы Правительстволу комиссияны президиумуну бюгюн бардырылгъан жыйылыууна кёре, администрацияланы башчыларына белгиленнген болжалдан он кюн алгъа, КъМР-ни жарыкъландырыу, илму эм жаш тёлюню ишлери жаны бла министерствогъа школлагъа тынгылы ремонт этиу бла байламлы федерал программагъа тюшер ючюн, къагъытланы берирге керекдиле.

КъМР-ни Башчысыны алгъадан берилген буюрууларына тийишлиликде жарашдырылгъан программагъа кёре, тынгылы ремонт  республиканы 63 школуну 75 мекямында этилирге керекди.  Излемлеге кёре, регионлагъа жыл сайын ремонт этиллик учрежденияланы регион тизмелерине тийишлиликде, къырал бюджет 20 процент багъасын береди. Ол программа беш жылгъа жарашдырылгъанды, жууукъ эки жылны ичинде Россейни Правительствосу битеулю билим берген юч минг учреждениягъа тынгылы ремонт этерикди. Анзор Езаов  муниципалитетледе ремонт бардырыллыкъ окъуу юйлени тизмелерин айтханды, анга кёре, Нальчикде эки школ, Бахсанда тёрт, Прохладныйде беш, Зольск районда тёрт, Лескенде бир, Май районда алты, Прохладна районда юч, Терк районда он эки, Урван районда он алты, Чегем районда эки, Черек районда эки, Элбрус районда алты мектеп жангыртыллыкъды. Мусукланы Алий администрацияланы башчыларына школланы тынгылы ремонтларын эл жерлени айнытыу бла байламлы комплексли программагъа кёре бардырыргъа боллукъларын да эслерине салгъанды.  

Миллет проектлени бардырылыууну юсюнден айта, премьер-министр муниципал къуралыулада 8 регион проектни бардырыргъа бёлюннген ахчаны бюгюнлюкге 60 проценти хайырланнганын билдиргенди. Мусук улу жер-жерли администрацияланы башчыларына бир-бир объектледе этилирге керекли ишлени юсюнден айтханды.

Муниципал сагъат бардырылгъанда районланы айырыулагъа хазырлыкъларыны юсюнден, ол санда айырыу участкалада  къоркъуусузлукъну жалчытыу соруула да сюзюлгендиле.

Вячеслав Гешев айтханнга кёре, регионда къол кётюрюуню 13 территориялы  эм 355 участка айырыу комиссия жалчытырыкъды. Айырыуланы къалай баргъанларына КъМР-ни Жамауат палатасы хазырлагъан 710 адам къарарыкъдыла.   

Бизни корр.

Поделиться: