Эркинликсиз алтын-кюмюш сатханды

Кёп болмай Къабарты-Малкъар Республикада МВД-ны дознание бёлюмю эркинликсиз алтын-кюмюш сатхан 52-жыллыкъ нальчикчи тиширыугъа Уголовный кодексни 171.1-чи статьясыны 1-чи кесегине тийишлиликде уголовный иш ачханды, деп билдиредиле КъМР-де МВД-ны пресс-службасындан.

Аманлыкъчыны законсуз иш бла кюрешгенине тийишли материалла РФ-ни УФСБ-ны КъМР-де бёлюмюню келечилери оператив-излеу жумуш бардыргъанларында жыйылгъандыла. Следствиени кезиуюнде тиширыу алтын-кюмюшден этилген аберилени, РФ-ни законодательствосунда айтылгъаннга бузукълукъ этип, маркировкасыз сатханы тинтилгенди. Алай бла санкциягъа кёре оперативниклеге аманлыкъчыны  сатыу точкасын къармаргъа тюшгенде 77 ювелир комплект табылгъанды: багъалы темирледен бла ташладан жарашдырылгъан 157 чакълы багъалы зат. Экспертиза аланы саулай багъасы 3,1 миллион сомгъа жетгенин белгилегенди.   

Тиширыу кеси айтханнга кёре, жууукъ тыш къыралладан биринде жашагъан танышыны тилеги бла ол тюкенинде багъалы товарладан кёрмюч къураргъа сюе эди. Бюгюнлюкде ачыкъланнган шарт бла байламлы терслеу материалла Нальчикни сюдюне а берилгендиле.

Поделиться: