Магъаналы ишлени шагъаты болгъан таулу къыз

СССР-ни кезиуюнде тюрлю-тюрлю сфералада жетишимли жаш адамланы жангы бийикликлеге кёллендириу къырал политиканы баш амалларындан бири болгъанды. Сёз ючюн, къыралны битеу шахарларындан, эллеринден фахмулу жашланы бла къызланы деменгили къыралыбызны ара шахарына Москвагъа чакъырып, съездле къурау сейир тёреледен бири болгъанды. Аллай жыйылыуладан бирине уа «Сукан-Суу» колхозну 23-жыллыкъ ийнек саууучусу Базоланы Роза да баргъанды.

1974 жылда ВЛКСМ-ни XVII съезди не бла белгилиди? БАМ комсомол къурулуш болгъаны белгили этилип, аны штабы къуралгъаны эмда  съездден ары биринчи отряд атланнганы бла къалгъанды ол тарыхда. Аланы ызларындан а къыралны битеу жерлеринден Байкал-Амур магистральны къураргъа мингле бла жашла бла къызла кетгендиле.   

Ма быллай магъаналы ишлени шагъаты болгъанды таулу къыз да. Комсомолну съездлерине чакъырылгъан жаш адамла ол заманлада уллу тинтиуледен ётгендиле:  делегатны жыл санына, ишде жетишимлерине эм кёп башха затларына уллу магъана  берилгенди. Базоланы Роза уа  ол излемлеге толусунлай келишгенди. 

Москвагъа барырдан алгъа уа «Сукан-Сууда» комсомолчуланы  жыйылыуунда Роза райсоветни депутатыча, колхозда бек иги ийнек саууучусуча  сёз алады. Ол 2-чи номерли сют фермада ишни къуралыууну юсюнден тынгылы хапар айтханды. Аны бригадасы хар ийнекден 2400 килограмм сют алыргъа борч алгъан эди, алай аны артыгъы бла толтургъандыла.   Роза  кеси уа хар   ийнекден 2800 килограмм сют алыргъа хазыр болгъанын билдиргенди. Дагъыда юч къызны да кесини усталыгъыны ташалыкъларына юйретирге борч алгъанды. 

Биринчи сауулуп башлагъан ийнекле кёп сют бермегенлери  белгилиди. Розаны фермасында уа ийнеклени кёбюсю аллайла эдиле. Ол угъай, 1972 жылда ол бригадаланы арасында бек аманладан бирине саналгъанды. Къысха замандан аланы къалай тюзеталдыла? Розаны усталыгъыны жашырынлыгъы - ол  маллагъа къарай билгениндеди. Биринчиден, ол  ийнеклени жууундурады: жылы суу бла сапын бла хар бирин ариулап, таза жерге кёчюреди. Аны бу иши  эллилеге сейир кёрюннгенди, алай ол хайырлы болгъанын ангылагъандан сора уа, башха фермалада да ишни былай къурап башлайдыла. Таза малла сютню да кёп бергенлерине бары да тюшюнедиле.

1973 жылда Базоланы къызны   райсоветни депутатына айырадыла. Ол  айырыучула бла дайым да тюбешип, жарсыуларын билип, аланы кетерирге къолундан келгенни аямагъанды. Анга шагъатха бир шартны келтирейик: Огъары Жемтала элни ара орамы жауун жауса адам ётмезча батмакъ эди. Роза, райисполкомгъа жюрюп, жолгъа асфальт салдыргъынчы тынчаймайды. Аны быллай жигерлиги ючюн элде къартла, жашла да хурмет этип башлайдыла. Ол жаш адам болгъанлыкъгъа, аны бла кенгеширге келгендиле.

ВЛКСМ-ни 17-чи съездинде районну жаш тёлюсюн ким кёргюзтюрге тийишли болгъаныны юсюнден сёз баргъанда,  кёп сагъыш да этмей, Розаны атын айтадыла. «Ол андан да кёп затха тийишлиди, - дегендиле жемталачыла, - Роза колхозну, эллилени жарсыулары бла жашайды». 

Базоланы къыз Москвагъа жолоучулукъну анга этилген уллу ышаныулукъгъача къарагъанды. Совет Союзну ара шахарындан Роза къанатла битгенча къууанып къайтханды. Ол Кремльни советле дворецинде тургъан кюнлерини, Леонид Брежнев этген докладны,   ВЛКСМ-ни 17-чи съездинде айтылгъанны юслеринден тенглерине, шуёхларына  къууанып билдирген  эди. 

Суратда Базоланы Роза ВЛКСМ-ни 
17-чи съездини делегатлары бла. 1974 жыл.