Иш кёллюлюгю, тирилиги бла махтау тапханды

Бу кюнледе КъМР-ни Парламентинде республиканы Къыраллыгъыны кюнюне жораланып саугъалау болгъанды. Бет жарыкълы ишлегенлени бир къауум адам законла чыгъарыучу органны Сыйлы грамотасына тийишли кёрюлгендиле. Аланы араларында уа Газаланы Байдуллахны жашы Масхут да болгъанды.

Ол ЛДПР партияны Къабарты-Малкъарда бёлюмюнде кёп жылланы тири ишлеп келеди, КъМР-ни Парламентини депутаты да болуп тургъанды. Школчуланы эмда жаш адамланы араларында таугъа ёрлеуден, жыгъышыудан, боксдан, шахмат, шашкаладан да ойнаудан эришиуле къурагъанды, алада хорлагъанланы саугъалагъанды.

Газа улу Къабарты-Малкъар къырал университетни тарых факультетин жетишимли бошагъанды. Болсада ёсюмлю, спортну кёп тюрлюлери бла кюреше келген, къарыулу жаш кесини кючюн юриспруденцияда сынар мурат этип, Россей Федерацияны Ич ишле министерствосуну Ставропольда юридический институтуна киргенди. Андан къайтып келгенинден сора уа, ол иги кесек жылны ич ишле органлада къуллукъ этгенди.

Аны урунуу китапчыгъында жаланда эки жазыу барды: КъМР-ни Ич ишле министерствосуну аппаратында бла Черек районну ОВД-сында ишлегени. Китапчыкъны къалгъан бетлеринде уа – саугъаланнганыны юсюнден жазыула: РФ-ни МВД-сыны, КъМР-ни Парламентини, МЧС-ни, Черек РОВД-ны белгилери.

Солуугъа Масхут милицияны подполковниги деген чында чыкъгъанды. Болсада ол бир кюн да бош турмагъанды. Кеп заманын ёсюп келген жаш тёлюню таза ниетлиле, спортну сюйгенле болуп ёсерча этиуге береди. Аны бла бирге уа КъМР-ни Баш сюдюнде квалификациялы комиссияны члениди. Черек районда жашагъанла уа ол быйыл да айырыулагъа ЛДПР партияны атындан къатышырын тилегендиле.

Алгъаракълада уа Газа улугъа Россей Федерацияны Федерал Жыйылыууну Федерация Советини таматасы Валентина Матвиенко къол салгъан Ыспас къагъыт келгенди. Пандемияны хатасындан ол иесине кечирек берилгенди. Аны Масхутха бере, КъМР-ни Парламентини Председатели Татьяна Егорова мындан ары да тутхан ишинде жетишимле болдурурун сюйгенин билдиргенди.

Масхут юй бийчеси Зухура бла бирге юч къыз да ёсдюргенди. Аланы барына да бийик билим алдыргъанды. Бусагъатда къызла кеслери сабийле ёсдюредиле. Беш да туудугъу уа Масхутну бла аны юй бийчесини кёз жарыгъыдыла.