Жангы мектепде ахшы билим алырча битеу онгла къуралыпдыла

Билимни кюнюнде Ново-Ивановское элде Шура Козуб атлы 7-чи номерли лицейни 440 жери болгъан жангы мекямыны ачылыуу болгъанды. Ол РФ-ни «Шимал-Кавказ федерал округну айнытыу» программасыны бардырылыууну чегинде ишленнгенди.

Жыйлыугъа КъМР-ни Парламентини Председатели Татьяна Егорова, РФ-ни Къырал Думасыны депутаты Геккиланы Заур, КъМР-ни къурулуш эм жашау журт-коммунал мюлкюню министри Алим Бербеков, Май муниципал районну администрациясыны таматасы Татьяна Саенко, КъМР-де Россейни миллет гвардия аскерлерини таматасыны орунбасары Алексей Трушин, жамауат келечиле, эллиле да къатышхандыла.

КъМР-ни Парламентини депутатларыны атларындан жыйылгъанланы Татьяна Егорова алгъышлагъанды:

- Биринчи сентябрь энчи, жюреклени къозгъагъан байрамды, ол жангы онгланы, чыгъармачылыкъ башламчылыкъланы белгилейди. Бюгюн биринчи класслагъа келгенлеге да мектепле эшиклерин кенг ачхандыла. Школну тауусурукъла да абадан жашауну босагъасына сюеледиле, битеу школчула уа бир кезиулю атлауучха ёрге боладыла.

Алай новоивановскечилеге бу бютюн энчи кезиудю, бюгюн жангы школ – Шура Козуб атлы 7-чи номерли лицей – эшиклерин ачады. Ол кёпден бери сакъланнган болумду, эсепле биз ышаннгандан эсе иги болгъандыла. Мектеп жарыкъды, ариуду, жангы технологияла бла жалчытылыныпды, мында сабийле ахшы билим алырча битеу онгла къуралыпдыла.

Республика ол кюн эки байрамны белгилегенин чертип, Татьяна Егорова  жыйылгъанланы КъМР-ни Къыраллыгъыны кюню бла алгъышлагъанды.

- Барыгъызны да бу байрам бла алгъышлайма, эмда сабийле, сизни хар жетишимигиз ёз Къабарты-Малкъарны игилигине къошумчулукъ болгъанын унутмагъыз. Саулукъ, насып, къууанч эм кёп тюрлю жетишимле!

Геккиланы Заур кесини сёзюнде шёндюгюлю школну ачылыуу ёсюп келген тёлюню тийишлисича айнытырча эм юйретирча ахшы болумланы къурау амал болгъанын белгилегенди. РФ-ни Къырал Думасыны депутаты, Къабарты-Малкъарда Росгвардияны кадет классы биринчи бу лицейде ачылгъанына эс буруп, окъуучулагъа жангы жетишимле, ахшы билим эм белгиле тежегенди.

Къызыл тасманы Татьяна Егорова, Геккиланы Заур эм Татьяна Саенко кесгендиле. «АССО» къурулуш фирманы таматасы Насталаны Алисултан лицейни директору Елена Хивричге жангы махкемеден энчи белгиси бла ачхычны бергенди.  

Школну ачылыуу эм Билимни кюню бла байламлы биринчи классха келген сабийле назмула окъугъандыла, алгъышла айтхандыла эм окъууда жетишимле болдурургъа сёз бергендиле. Байрам линейканы хычыуун кезиую уа жангы окъуу жылны белгиси болгъан биринчи къонгуроуну зынгырдауу болгъанды. Ызы бла къонакъланы мектепни ичинде айландыргъандыла.

Жангы мекям шёндюгюлю излемге келишгенин белгилерге тийишлиди, анда ашхана, саулукъгъа къарагъан оту, фильмотека, актовый зал эм башы жабылгъан спортзал бардыла. Ара блокда окъутуу эм лабаратор классла, къошакъ билим берген жерле ишленнгендиле. Комплексге дагъыда футбол майданы бла стадион, баскетбол эм волейбол майданла къошулупдула. Энчи котельня, резерв генератор установка да къуралгъандыла.

Алай бла лицейде ёсюп келген тёлюню не жаны бла да айнытырча, окъуучулагъа ахшы билим берирча битеу онгла къуралыпдыла.