Борчлары ёсгендиле

Быйыл озгъан жети айгъа Къабарты-Малкъарда жашау журт-коммунал мюлк жаны бла биригиулени электрокюч ючюн борчлары 19 миллион сомгъа ёсгенди. Алай бла бюгюнлюкде аланы саулай   «Каббалкэнерго» компаниягъа  223 миллион сом берликлери барды.  

Бусагъатда республикада кёп фатарланы жумушларына къарагъан 78 управляющий компания ишлейди. Хайырланылгъан ток ючюн ёнкючню асламысы аланы жыйырма тогъузусуна жетеди. Ол санда «Эльбрус–Сервис» - 12,6, «Партнер» – 8,7, «Муниципальная управляющая компания» – 7,5, «Предгорный – 6,6, «УК Тырныауз плюс» – 5,6, «Управдом» (Баксан) – 4 эм «Управляющая компания «Нальчик» 5,4 миллион сом берликлери барды.

- Кёп фатарлагъа къарагъан, сагъынылгъан управляющий компанияланы борчлары дайым ёсгенлей барады. Бюгюнлюкде аланы тизмесинде эм осалгъа «ЖЭУК «Жилсервис» компанияны санаргъа боллукъду. Аны борчу 21 миллион сомдан атлайды. «Мегаполис» биригиуню да болуму андан иги тюйюлдю, аны да 13 мллион сом чакълы берлиги барды. Ёнкючню жабарча кёп тюрлю къыйматлы  онгла бардыла, ол санда кесек-кесек тёлерча. Болсада, жашау кёргюзтгенича, аладан сюд этилмей ахчаны алырча башха  амал къалмайды, - дейди «Каббалкэнерго» компанияны таматасыны орунбасары Элина Шустова.

Аны бла бирге хайырланнган ток ючюн заманында эмда толусунлай тёлеген абонентле да кёпдюле. Аланы тизмесинде «Идар», «ЖЭУК Наш Дом», «УЮТ», «Оазис», «Вертикаль», «СЖСК», «Комфорт-Сервис» биригиулени белгилерге боллукъду.    
Магометланы Сулейман.

Поделиться: