Биринчи курсха уллу муратла бла

Биринчи сентябрьде Къабарты-Малкъар къырал аграр университетде КъМР-ни къыраллыгъыны бла Билим бериуню кюнюне жоралап биринчи курсну келечилери бла тюбешиу болгъанды. Вузну ректору Аслан Апажев къууанч жыйылыуну ача бийик билим алыргъа биринчи атлам этген жаш адамланы, ата-аналарын да жарыкъ байрамла бла алгъышлагъанды.  

- Бюгюн Билимни кюнюдю, алда жангы окъуу жыл сакълайды, къыралда жюз мингле бла биринчи классха эм курсха барадыла. Аны бла бирге, бизни аграр университетде бийик билим алыкълагъа да сынамлы, жетишимли устала болурларын тежейме. Эсге сала айтсакъ, быйыл вузгъа 40 жыл толлукъду. Ол кезиу окъуу учреждениягъа аз тюйюлдю. Мында ишлерин билген бийик квалификациялы преподавательле урунадыла эм жарыкъландырыу ишни бюгюннгю излемлеге кёре бардырырча аламат болум къуралгъанды, дегенди Аслан Каральбиевич.

Ызы бла жаш адамла бла ата-анала факультетлени деканлары бла танышхандыла, билим бериу къалай тюрлю бардырылгъаны бла шагъырейленнгендиле, инфраструктурагъа эм башха къошакъ онглагъа да эс бургъандыла.  

Бюгюнлюкде университет окъуучуларына билимлерин теориядан байыкъландырып къоймай, сынамларын да кючлерча уллу иш бардырады. Анга кёре, студентле республиканы 200 артыкъ бийик технологиялы предприятияларында практикаларын ётерча келишим къуралгъанды. Аны бла бирге вуз Абхазия, Азербайджан, Белоруссия, Словакия, Юг Корея, Швейцария эм башха тыш къыралла бла да байламлыкъ жюрютеди.

Студентле дерследен тышында заманларын хайырлы ётдюрюрча да учрежденияда кёп сеийр зат барды. Ол санда беш спорт зал, корт, стадион, юзмезли волейбол, футбол секцияла, кружокла эм клубла ишлейдиле.  

Жаш адамланы не тюрлю жаны бла да къыйматлы башламчылыкълары тутхучлукъ тапмай къалмайды. Окъууда, илмуда, спортда, чыгъармачылыкъда эм жамауат ишледе да кеслерин айырмалы кёргюзтгенлеге жыйырма тюрлю стипендия тёленеди.   

Ол кюн биринчи курсну келечилери да къатышып уллу концерт программа болгъанды. Белгили преподавательлени, тегнлерини санында суратха тюшерге сюйгенлеге да аллй онг табылгъанды.