Промышленность эм эл мюлк предприятияланы ишлери бла шагъырейленнгенди

КъМР-ни Башчысы Казбек Коков бир-бир промышленность эм эл мюлк предприятиялада ишчи тюбешиуле бардыргъанды, андан сора да, жоллада къурулуш ишле къалай баргъанына къарагъанды. Жолоучулукъда республиканы оноучусуну биргесине КъМР-ни Правительствосуну Председателини биринчи орунбасары Сергей Говоров, эл мюлк министр Хасан Сижажев, транспорт эм жол мюлк министр Аслан Дышеков, муниципалитетлени администрацияларыны башчылары болгъандыла.

 Эски Черекде республиканы Башчысы «Агро плюс» деген акционер обществону тахта кёгетле салгъан жеринде болгъанды, ол республиканы агропромышленность  предприятияларыны араларында эм уллуладан бирине саналады, анда производство «тёгерек амалла бла» къуралгъанды. Башхача айтханда, мында тахта кёгетлени кеслери ёсдюредиле, жарашдырадыла, тюкенледе сатылырча консерва продукция этип да чыгъарадыла. Биригиуде 180 адам урунады.

Бюгюнлюкде предприятияны бахчаларында тахта кёгетлени жыйыу барады, ол санда томатланы, нашаланы, чибижини эм башха битимлени. «Агро плюс» консерва продукциясын Россейни кёп регионларына жибереди.

Ново-Ивановское элни сабанларына да баргъанды Башчы, шёндю алада тирликни къыстау жыйгъан кезиулериди. «Ленинчиле» деген эл мюлк кооперативни ишчилери мирзеу жыйыуну бошагъандыла, бюгюнлюкде мирзеулюк нартюхню оруп башлагъандыла.

Эл мюлк предприятияда 313 адам урунады. Кооператив кюзлюк будайны эм арпаны, андан сора да, чёплеуню, силослукъ нартюхню, сояны, къудоруну, бир эм кёпжыллыкъ битимлени, башха затланы да ёсдюреди.

Казбек Коков Герменчикде «ЭРПАК» деген жабыкъ акционер обществода да болгъанды. Биригиуде картонну чыгъарыу жаны бла битеу производство иш аллындан башлап, ахырына дери къуралгъанды. Анда картонну жукъа тюрлюсюн эм гофра къагъытны этедиле. Предприятияда 300-ге жууукъ адам урунады. Бир айгъа мында 4000 тонна гофра къагъыт эм картонну жукъа тюрлюсю чыгъарылады. Бу биригиу Россейни Юг жанында къалын къагъытны акъ тюрлюсюн жиберген жангыз предприятиягъа саналады.  

Кийимле тикген «Воентекстильпром» ачыкъ акционер обществону «Авангард» фабрикасында уллу производство къуралгъанды, анда 600-ге жууукъ адам урунады. Мында арт кезиуде уллу  инвестиция проект хайырланыргъа берилгенди. Къабарты-Малкъарны Башчысы иш къалай къуралгъаны бла шагъырейленнгенди. Фабрика беш цехден къуралады, ол санда сынаула бардыргъан, басма этген, къумачланы бичген, хазырлагъан, тикген эм продукцияны бирге жыйгъан цех. Биригиуню Бахсанда бла Залукокоажеде бирлешип ишлеген бёлюмлери барды. Мындан арысында да биригиу производство кючлерин кенгертир мураты барды, бёлюмлеринде ишчи жерлени да кёбейтирикди.

Шёндю биригиу айный барады, анда заманны излемине кёре технологияла да сингдириледиле,  республиканы бюджетине кезиуюнде налогла тёленедиле, жангы ишчи жерле къураладыла. Казбек Коков предприятияны оноучулары бла тюрлю-тюрлю сорууланы сюзгенди, ол санда социальный магъаналы, айныргъа къаллай муратлары болгъанын, уруннганланы иш хакъларын кётюрюу, алагъа ишлеген жерлеринде тап болумла къурау, профессионал билим берген учрежденияла  бла  байламлыкъ жюрютюу эм ишчилени квалификацияларын кётюрюу. 

Республиканы Башчысы эл мюлк предприятиялада эм промышленностьда уруннганланы ашхы ишлегенлери ючюн ыспас этгенди эм Къабарты-Малкъарны Къыраллыгъыны кюню бла алгъышлагъанды.  

Бизни корр.