Тыш къыраллада жашагъанлагъа себеплик этилликди

РФ-ни Пенсия фондуну правленини башчысы Максим Топилин бла Росcотрудничествону таматасы Евгений Примаков бирге ишлеуню юсюнден келишимге къол салгъандыла. Анга кёре Россейни Законодательствосуна эм аны халкъла аралы актларына тийишлиликде фонддан тыш къыраллада жашагъан жерлешлерибизге социал эм пенсия тёлеулени этиуню юсюнден видеосвязь бла консультацияла берилликдиле. Бу амал бла, эм алгъа, Израильде жашагъан пенсиячыла хайырланаллыкъдыла.

Максим Топилин билдиргенича, бюгюнлюкде фондну специалистлери жыл сайын Израильге бла Латвиягъа консультацияла этерге барадыла, алгъа приёмгъа келген адамланы саны талай мингнге дери жетеди. Видеоконсультацияла кийирилгенликге, ол сынам сакъланырыкъды, дегенди ол.

- Пандемияны хатасындан кёп къыралла, ол санда Россей да, ишчи эм окъутуу жумушланы онлайн халда тамамлаугъа кёчгендиле. Аны бла байламлы информация системаланы айнытыуда дагъыда бир атлам этилгенди. Пенсия фонд бла келишим тыш къыраллада тургъан жерлешлерибизге шёндюгюлю технологияланы юслери бла  жангыз сёз бла угъай, иш бла да себеплик этерге болушурукъду, - деп чертгенди Евгений Примаков.

Бу келишимни болжалы жокъду. Бусагъатда Пенсия фонддан тёлеулени 122 тыш къыралда 342 пенсиячы аладыла. Аланы эм кёбюсю Германияда (97,7 минг адам), Израильде (56,1 минг), Абхазияда (32,8 минг), Беларусьда (25,4 минг), Латвияда (22,7 минг) бла Американы Бирлешген Штатларында (21,3 минг) жашайдыла. Россотрудничествону системасында 80 къыралда 97 представительство ишлейдиле.

Пропискалары болмагъан россейлилеге тёлеуле аланы тургъан жерлерине тапдырыладыла

Россейни пропискалары болмагъан гражданларына социал пенсиялары тургъан жерлеринде бериледи. Къыралда жашагъанларына шагъатлыкъны ала фондха заявление жазып неда социал жумушланы жалчытыу организацияладан, тюзетиу эм билим бериу учрежденияладан справкала алып эталлыкъдыла.

Социальный пенсия алыр ючюн, ала Россейде дайым жашаргъа, жылгъа бир кере фондда кеслери келип аны юсюнден заявление жазаргъа борчлудула. Адамгъа тёлеулери  тургъан жерине тапдырыла эсе неда ол ахчасын кассада ала эсе, заявление изленирик тюйюлдю. Пенсиячы медицина, тюзетиучю неда билим бериу учрежденияда (сёз ючюн, ёксюзле) эсепде тура эсе, андан да заявление алынмайды.

Алай бла федерал законнга тийишлиликде социал пенсияны алыргъа Россейде дайым жашагъанла алыргъа эркиндиле, аланы къауумуна была киредиле:

- чекленнген онглары болгъанла, сабийликден сакъатла;

- аталары неда аналары ёлген 18 жыллары толмагъан сабийле эм 18 жылдан таматала, ала очный халда окъуй эселе;

- ата-аналары белгисиз сабийле;

- Северны аз санлы халкъларыны келечилери, алагъа 55 (эр кишилеге) эм 50 (тиширыулагъа) толгъан эсе;

- Страховой пенсия алыргъа эркинликлери болмагъан 65,5 жыллары толгъан эр кишиле эм 60,5-жыллыкъ тиширыула;

- Россейде бек аздан 15 жыл жашагъан тыш къыраллы эм гражданстволары болмагъанла (эр кишиле – 65,5 жылдан, тиширыула – 60,5 жылдан сора).

Эркинликлеригизни юсюнден билип турурча

Пенсия фондда инсанны энчи лицевой счёту, кёпле суннганча, банкда счётуча тюйюлдю - анда ахча угъай, адамны пенсия эркинликлерини юсюнден информация сакъланады. Анда болгъан информация жорукълагъа тийишлиликде къаты къорууланылады. Бусагъатда аны юсюнден талай амал бла билирге боллукъду:

- Энчи кабинетни юсю бла

Анда жыйылгъан пенсия балланы, страховой стажны, урунуу кезиулени, ишлеген жерлеригизни, иш бла жалчытхан организация сизни ючюн этген тёлеулени, иш хакъыгъызны юсюнден битеу информация барды. Андан тышында, сервисде пенсия калькулятор бла хайырланыргъа, аны болушлугъу бла боллукъ пенсияны ёлчемин тюрлендирирча мадарланы юслеринден билирге да боллукъду. Жангыз да къырал жумушланы сайтында - www.gosuslugi.ru бла идентификацияны бла аутентификацияны (ЕСИА) бирикдирилген системасында эсепге тюшерге керекди.

- Клиент службаланы болушлукълары бла.

Аны ючюн фондну жер-жерли бёлюмюне барып, заявление жазаргъа тийишлиди, биргегизге паспортугъуз болургъа керекди. Жууапны 10 кюнден сора берликдиле.

- www.gosuslugi.ru порталда.

Аны ючюн къырал эм муниципал жумушланы порталында эсепге тюшерге борчлусуз. Аны «Электрон жумушла» деген бёлюмюнде «Энчи кабинетге» кодну алгъандан сора «Россей Федерацияны Урунуу эм социальный къорууланыу министерствосу» деген жазыуну, анда уа «Россей Федерацияны Пенсия фонду» бёлюмню сайлагъыз. Анда онлайн халда счётугъузда болгъан информацияны кёрлюксюз.

- Банкда.

Бу амал бла хайырланыр ючюн, алгъа сиз клиенти болгъан банк быллай жумушланы тамамлагъанын бла къалгъанын билигиз. Аны келишими бар эсе, информацияны кредит учрежденияны специалистинден къагъытда неда банкоматда эслектрон халда алыргъа боллукъсуз.

Ахшы жангычылыкъладан бири быйылдан башлап, Россейни Пенсия (ПФ) фонду 45 жылдан абадан адамлагъа пенсия счётларыны, стажларыны эм боллукъ страховой пенсияларыны ёлчемини юсюнден юч жылгъа бир кере билдире турлугъуду. Аны юсюнден информация фондну сайтында гражданинни энчи кабинетине неда къырал жумушланы порталында кабинетине ийилирикди.

Адам ол данныйледе халат эслесе, фондха аланы тюзетиуню юсюнден заявленияны жазаргъа, шагъатлыкъгъа документлени да берирге керекди. ПФ, иш бла жалчытхан организациялагъа, архивлеге, башха тийишли органлагъа запросла ийип, аланы тюзлюклерин сюзерикди. Тинтиулени эсеплерине кёре, лицевой счётха тюрлениуле кийирликди.