Агропромышленный комплексге – къыйматлы ёнкюч бла субсидирование

Кёп болмай «Деловая Россия» жамауат организацияны Къабарты-Малкъарда бёлюмюнде республиканы Эл мюлк министерствосу да къатышып «тёгерек стол» болгъанды. Ол къырал программаланы чеклеринде  агропромышленный комплексге къыйматлы ёнкюч бла субсидирование берилирча соруугъа жораланнганды.     

КъМР-ни Эл мюлк министерствосунда къырал программаланы ахча бла жалчытыу жаны бла бёлюмюню таматасы Людмила Кайтукова айтханнга кёре, быйыл къысха заманда тёлеп бошарча 26 заявка бла  672 миллион сом чакълы льгота ёнкюч берилгенди. Андан сора да, 553 миллиондан аслам льготалы  инвестиция ёнкючге да онбир заявка этилгенди.  

Эсге сала айтсакъ, республикада Эл мюлк министерствону программаларына кёре, къыйматлы кредитлени жаланда алты финанс учреждение берирге эркиндиле. Быйыл эл мюлк бёлюмде уруннган бёлюмлени асламысы ахча бла жалчытылыннгандыла. Болсада ведомствода жылны ахырына дагъыда къошакъ халда ахча берилирге  боллугъун  да билдиргендиле. Бюгюнлюкде жаланда  «Малчылыкъ»  эм «Сют малчылыкъ» бёлюмлеге лимит сакъланады.     

КъМР-де Гитче эм орта бизнесге кредит берген фондуну бёлюмюню таматасы Хадис Дударов айтханнга кёре, финанс организация энчи предпринимательле бла биригиулени гитче ёнкючле бла толу  жалчытады. Ол санда быйыл алагъа жылгъа 6,5 эм 9,75 процент тёлерча 8,5 миллион сом чакълы ёнкюч бергенди.  

Къырал программаланы чеклеринде агропромышленный комплексге болушлукъ тапдырыуну юсюнден Россельхозбанкны эм Сбербанкны республикада гитче эм орта бизнесни келечилери бла ишлеген бёлюмлерини таматалары Залим Алоков бла Курданланы Рашид айтхандыла.   

Тюбешиуге къатышханланы жарсытхан соруулагъа жууапла берилгендиле. Ол санда программалагъа документлени хазырлау, тирликни страховка этиу, бир тюрлю сылтау бла ёнкючню аслам заманны тёлеу, ёнкюч ючюн залог бериу, къыйматлы проектлени бардырыу эм башха соруула  сюзюлгендиле.