Жетишим болдургъан спортчулагъа - къырал саугъала

КъМР-ни Башчысы Казбек Коковну Буйругъуна кёре, Россейни спортдан сыйлы устасы, Олимпиада оюнланы чемпионкасы Мария Ласицкене физический культураны  бла спортну айнытыргъа салгъан къыйыны эм  спортда кёргюзтген бийик кёрюмдюлери ючюн «Къабарты-Малкъарны алында къыйыны ючюн» деген орден бла саугъаланнганды.

Спортда бийик кёрюмдюлени болдурургъа салгъан къыйыны ючюн Къабарты-Малкъар Республиканы Башчысы Геннадий Габриляннга алгъышлау этгенди.

КъМР-ни Правительствосуну буйругъуна кёре, Мария Ласицкенеге Токиода Олимпиада оюнлада болдургъан хорламы ючюн, бир миллион сом саугъагъа берилликди. Къабарты-Малкъардан Олимпиадагъа къатышхан башха спортчу - Михаил Акименко,  250 минг сом аллыкъды.   

Тренерлеге  Геннадий Габриляннга  бла Артур  Артамоновха, белгили спортчуланы хазырлагъаны ючюн, башда сагъынылгъан суммаланы 50 проценти берилликди. 

Юсюбюздеги жылны биринчи жарымы ючюн ахча саугъаланы Россей Федерацияны жыйымдыкъ командасыны къауумунда болгъан Олимпиада оюнлагъа кирген эм спортну аллай оюнларына кирмей, алай  дунияны, Европаны, Россей Федерацияны чемпионатларында эм биринчиликлеринде алчы жерлеге тийишли болгъанла эм аланы юйретгенле  аллыкъдыла.

Саулай да республикадан аллай саугъаланы 140 спортчу эм аланы юйретгенле аллыкъдыла. Битеу да жылны биринчи жарымында спортда болдургъан жетишимле ючюн республикалы бюджетден башда сагъынылгъанлагъа юч миллиондан аслам сом берилгенди.

 Бизни корр.

Поделиться: