Политика партияланы баш борчлары - адамланы жашауларын игилендириудю

КъМР-ни Башчысы Казбек Коков регионда политика партияланы оноучулары бла тюбешиу бардыргъанды.

Анга КъМР-ни Башчысыны Администрациясыны таматасы Мухамед Кодзоков, КъМР-ни Айырыу комиссиясыны председатели  Вячеслав Гешев,  «Инсан платформа»  деген политика партияны КъМР-де регион бёлюмюню   толтуруучу комитетини  председатели  Аслан Афаунов,  Либерал-демократия политика партияны  Къабарты-Малкъар Республикада регион бёлюмюню таматасы Владимир Безгодько,  «Ёсюм партия»  деген Битеуроссей политика партияны регион бёлюмюню таматасы Бетал Ивазов,  «Справедливая Россия-патриотла тюзлюк ючюн» деген социалист политика партияны  КъМР-де регион советини председатели Владимир Кебеков,  «Яблоко» деген  Россейни бирикген демократия партиясыны Къабарты-Малкъар Республикада председатели Кучмезланы Хаким,  «Россей Федерацияны коммунист партиясы» деген политика партияны Къабарты-Малкъар Республикада бёлюмюню биринчи секретары Борис Паштов, «Жашилле» деген Битеуроссей политика партияны  КъМР-де бёлюмюню регион советини таматасы Сафарбий Шхагапсоев къатышхандыла.

Быйыл сентябрь айда бардырыллыкъ айырыулагъа хазырланыу эм партияланы ишлерини юсюнден соруула сюзюлгендиле.  Вячеслав Гешев билдиргеннге кёре, республикада айырыула бардырылгъан кезиуде 13 территориялы эм 355 участкалы айырыу комиссия ишлерин бардырлыкъдыла. Айырыула къалай баргъанларына КъМР-ни Жамауат палатасы хазырлагъан 710 къараучу къарарыкъды.

Айырыу участкалада къоркъуусузлукъну жалчытыу, ол санда санитар-эпидемиология жаны бла да  мадарла этиледиле.

Партияланы келечилери  айырыуланы алында республиканы  оноучусу бла тюбешиуню магъанасын белгилегендиле, КъМР-ни Башчысыны  Администрациясы эм КъМР-ни Айырыу комиссиясы бла байламлыкълары ачыкъ болгъанларын, ишлерини эм муратларыны юслеринден  айтхандыла.  Казбек Коков тюбешиуню ахырында республикада кёргюзтюлген битеу политика партияланы ишлерини баш борчлары, адамланы жашауларын игилендириу болгъанын чертгенди.

 Бизни корр.