Къошакъ билим бериуге - энчи магъана

Кёп болмай Элбрус районда устазланы август кенгешлери ётгенди. Анга муниципалитетни администрациясыны башчысыны къуллугъун толтургъан Сотталаны Къурман, аны орунбасары Арслан Улимбашев, билим бериу управленияны таматасы Атаккуланы Нюржан, мектеплени таматалары, устазла эм башхала къатышхандыла.

Сотталаны Къурман, жыйылыуну ача, устазланы жууукълаша келген Билимни кюню бла эм жангы окъуу жыл бла алгъышлагъанды. Ёсе келген тёлюню сынамлы, тохтаусуз билимлерин ёсдюрюрге итиннген эм жангы амалланы хайырланнган устазла окъутханларын белгилеп, ишлеринде жетишимле тежегенди. Аны бла бирге билим бериу система бла байламлы башха магъаналы соруулагъа да эс бургъанды.

Ызы бла Атаккуланы Нюржан Элбрус районда билим бериу системаны айнытыуну, ол санда баш стратегиялы амалланы, жетишимлени, проблемаланы эм къыйматлы программаны юсюнден толу доклад этгенди.

Кенгешде туура этилгенича, быйыл жангы окъуу жылда районда «Билим бериу» миллет проектге кёре къошакъ билим берген тогъуз «Точка роста» ара ачыллыкъды. Аны бла бирге Тырныауузну 5-чи номерли гимназиясында, 3-чю номерли орта школунда эм Элбрусну мектебинде «Химия», «Физика» эм «Биология» кабинетле ишлерикдиле. Огъары Бахсанда да  40 сабийге садик бите турады. Терс-Къолда да жангы сабий сад толу кючю бла ишлеп тебирерикди.

Ахырында кётюрюлген соруула бла байламлы тийишли инстанциялагъа эсгертиуле этилгендиле. 

Магометланы Сулейман.
Поделиться: