Ишчи рынокда бир миллион программист керекди

Кёп болмай «Деловая Россияны» Къабарты-Малкъарда бёлюмюню келечиси, бизнесни айнытыу жаны бла эксперт Индира Гузеева «Свой круг» деген бизнес-клубну келечилерине ITV компанияны таматасы Алтууланы Мурат бла тюбешиу къурагъанды. Анга «Деловая Россияны» бёлюмюню сопредседатели Бетал Ивазов, «Хорека-Нальчик» компанияны таматасы Наталья Шевченко эм республиканы предпринимательлери да къатышхандыла.

Тюбешиу компанияны офисинде public talk форматда ётгенди. Алтуу улу бизнесде биринчи атламла къалай этгенини эм бюгюнлюкде излемлени, блокчейн-технологияланы юсюнден да билдиргенди. Къыйматлы проектлени юсюнден айта, КъМР-ни Жарыкъландырыу, илму эмда жаш тёлюню ишлери жаны бла министерствосуну, Къабарты-Малкъар къырал университетни болушлугъу бла «Мен программистме» деген социал проектни ишинден хапарлагъанды. Ол санда Информатика институтну мурдорунда ыйыкъгъа бир кере 8-11 класслада окъугъанлагъа программированиядан хакъсыз курсла ётдюрюлгенлерин да.  

Алтууланы Мурат бюгюнлюкде къыралны IT-бёлюмюнде бир миллион чакълы специалист-программист жетмегенин, аланы иш хакълары регионда жюрюген орта айлыкъдан юч кереге кёп болгъанын да чертгенди.

Ахырында предпринимательле къонакъдан бизнесни бардырыу бла байламлы проблемаланы эмда тюрлю-тюрлю модельлени сюзгендиле.