Битимлени кёп тюрлюлеринден бай республика

Бюгюн сагъат онда Къабарты-Малкъар къырал университетде «тёгерек стол» бардырыллыкъды. Анда битимлени генетика ресурсларыны Н.И. Вавилов атлы Битеуроссей институтуну (ВИР) бла КъМКъУ-ну алимлерини илму экспедицияларыны эсеплерин чыгъарлыкъдыла. Бу ишни ала Къабарты-Малкъарда кеси алларына ёсген кёгетлени жангы тюрлюлерин излер хыйсап бла къурагъан эдиле.

Эсге сала айтсакъ, быйыл эки экспедиция бардырыллыкъды. Анга университетни «Ботаника бахча» илму арасы да къатышырыкъды. Бу айда республиканы битеу районларында битген кёгетлени сагъынылгъан тюрлюлерин излеу барады, сентябрьни ахырында уа алимле нартюхню бизде ёсген тюрлюлерин тинтиу бла кюреширикдиле.

ВИР-ден экспедицияны къауумуна генетика ресурсла бёлюмню таматасы, эл мюлк илмуланы кандидаты Анна Артемьева бла институтда битимледен жыйымдыкъ материаллагъа кёз-къулакъ болгъан Анастасия Курина киредиле. Университетни атындан сагъынылгъан бахчаны башчысы, биология илмуланы кандидаты Заур Шерхов, араны келечиси, профессор, биология илмуланы доктору Сафарби Шхагапсоев эм башхала ишлейдиле анда. Аладан сора да, бу жумушха Германияда Юлиус Кюн атлы Федерал илму-излем институтну эксперт къаууму къатышады. Ол санда доктор Франк Марте, аспирантла Лукас Вайсенборн, Даниэль Барон фон Мейделл эм Ахмед Эль Менуави.

Экспедицияны къурагъанла белгилегенлерича, битимлени тюрлюлеринден кёплюгю бла Къабарты-Малкъар Республиканы саулай Россейде окъуна энчи жерге санаргъа тийишлиди. Кавказда ёсген хансланы экиден бири бизде да бардыла. Субтропика эмда тропика флорадан къалгъан затланы барын да табаргъа боллукъду мында.

Улбашланы Мурат хазырлагъанды.
Поделиться: