Сабийле эм ПДД

Билимни кюнюне хазырлана Элбрус районда сабийле жоллада жюрюуде жорукъланы (ПДД) юсюнден тест ётедиле. «Акъылбалыкъ болмагъан велосипедчи» деген ишни чеклеринде тийишли акцияны ГИБДД-ны муниципалитетде бёлюмюню келечилери Тырныауузда бардыргъандыла, деп билдиргендиле КъМР-де МВД-ны пресс-службасындан.

Жол полициячыла сабийлеге велосипедде машинала болмагъан тийреледе, кесин да таматала кёз туураларындан кетмей учаргъа жарагъанын ангылатхандыла. Дагъыда гитчелени башларында каскалары, къолларын, аякъларын къоруулагъан затлары да болургъа керекдиле. Аны барын да айтхандан сора инспекторла сабийлеге энчи памяткала юлешгендиле, аланы ата-аналарына кёргюзтюп, бирге окъургъа чакъыргъандыла.

Акцияны ахырында полициячыла сабийлени арасында соруу бардыргъандыла. Жоллада жюрюуде жорукъланы толуракъ билгенлеге басма материалла юлешгендиле, жангы окъуу жылда айырмалы окъургъа, кеслерине да сакъ болургъа чакъыргъандыла.

Улбашланы Мурат хазырлагъанды.
Поделиться: