Инсан терс ишлерине сокъуранып, тобагъа къайтса, аны жаны жангыдан жаратылады

КъМР-ни наркология диспансерини врачы Артур Пачев айтханнга кёре, больницалада багъылгъан наркоманладан хазна адам тюзелмейди. «Мен Россейде бек белгили клиникалада ишлегенме, - дейди Пачев. - Алада сау болгъанланы санына бир неда юч жыл наркотиксиз жашагъанла да киредиле. Ол жаланда ремиссияды. Ачыкъ айтханда, шёндюгю медицина наркоманиягъа бакъмайды».

Болсада наркотиклени эм ичгичиликни тузагъындан толусунлай ычхыннганла бардыла. Ала ийнаннган адамладыла. Ирина Виксниньш жыйырма алты жыл наркоманка болгъанды, аладан онекисин колонияда тутулуп тургъанды. Дин жашаууна киргенден сора, ийман жюрегин жарытхандан сора жангы жашау башлагъанды. Бусагъатда ол жазыучуду, бир проза китабын чыгъаргъанды, дагъыда назму жыйымдыгъын басмалагъанды.

Ставрополь крайны Киров районунда Зольская станица барды. Мында наркоманлагъа бла ичгичилеге христиан реабилитация ара ачылгъанды. Багъыуда бир таблетканы да хайырланмайдыла. Саусузла жаланда  Аллахдан болушлукъ тилегенлей турадыла. Реабилитация арада мастерской барды. Мында тауукъла, баппушла, эчкиле тутадыла. Бахчада картоф, помидор ёсдюредиле. Къысхасы, ишлерге сюйгеннге аллай онг барды. Не сейир, мен христиан реабилитация арагъа келген кюнюмде мында Къарачайдан бир муслийманны да кёргенме. Ол намаз этеди.

Бу христиан арада жыйырма жыл наркоман болуп тургъан  жаш саппа-сау болгъанды. Аны жанын, санын да наркотикледен къутхаргъан жаланда ийманыды. «Манга кёп клиникалада бакъгъандыла, ала  болушалмагъандыла,-дейди ол. –Христиан реабилититация арада уа болушхандыла. Адам жаланда кесини кючюне ышанса, наркотикледен къутулаллыкъ тюйюлдю».

Бу жаш заманында Грозныйде белгили спортчу болгъанды. Баууру ауругъанындан сора врачла спорт бла кюреширге жарамагъанын айтхандыла. Ол спортсуз къалай жашаргъа билмей эди. Ма ол заманда аны жашаууна наркотикле киргендиле.

Ийман бла багъыу жаланда христиан динде угъай, исламда да барды. Бу эки динде бир кибик затла бек кёпдюле, анга сейир этерчады. Сёз ючюн, Исса да, Мухаммад файгъамбарла  да адамлагъа бакъгъандыла. Дарманла бла угъай, Аллахны сёзю бла. Яникойну иймамы Элеккуланы Хасан  былай айтады: «Адамда битеу иги зат Аллахданды, битеу осал  зат а шайтанданды деп, Къуранда жазылып турады. Кёпле ичги бла наркотикле жашауларын бузгъанларын ангылайдыла, алай тохтаргъа кюч тапмайдыла».

Хасан хажини айтханына кёре, жууукъла-тенгле гюняхлы жанны къыйынлыгъында атып къоймай, болушургъа борчлудула. Бизде уа кёбюсюнде абыннган адамгъа ат башындан къарайдыла, аны халкъ жыйылгъан жерде сындырадыла, жюрегин къыйнайдыла. Ол терс ишди.  «Къуранда Аллах былай айтады: «О, мени гюняхлы къулларым! Аллахны жандауурлугъундан умутугъузну юзмегиз! Аллах битеу гюняхланы кечеди», - деп. Бу сёзле хар адамны эсинде болургъа керекдиле», - дейди Хасан хажи.

Адам, этген терс ишлерине сокъуранып, тобагъа къайтса, аны жаны жангыдан жаратылады. Жангы, иймандан толу жан а гюняхдан къачады.