Ишинги тынгылы билсенг, не къыйын адамны да кёлюне жетериксе

Къайсы ёмюрде да тиширыула бютюн ариу болургъа, кеслерин жасаргъа кюрешгендиле. Бу итиниулюклеринде уа алагъа визажистле болушадыла. Аладан бири Эркенланы Заринады, анга келген къызланы араларында ишине ыразы болмай къалгъанла хазна табылырла. Аны ишини Инстаграмда суратлары уа бу сёзлеге шагъатлыкъ этедиле. Зарина бизни республикада оннга жууукъ жылны жашайды, ол Къазахстанны Алма-Ата шахарында туугъанды, анда ёсгенди. Мында атын ишин билген визажистча айтдыргъанды.

Визажист Алма-Атада Къазах-Америкалы университетни тауусханды, финансист усталыкъны алгъанды. Алай жюреги уа визажгъа тартханды, бу усталыкъгъа Къазахстанда белгили специалист, къыралны визажистлени ассоциацияларыны президенти Диля Абдуллаевада юйреннгенди.

- Анда кёчгюнчюлюкден сора къалып къалгъанбыз. Ата-бабаларым Чемалган (Шималгъан) элге тюшген эдиле. Бусагъатда, айтханымча, юйюрюм Алма-Атада жашайды. Анда тургъан къарачайлыла бла малкъарлыла бир бирлери бла шуёхлукъну бек къаты жюрютгенлерин белгилерге сюеме. Анда аман жашайбыз десем, ётюрюк айтырыкъма. Къазахстанны президенти бизни халкъларыбызгъа бек иги болады, андагъы миллетлени барысына да энчиликлерин сакъларгъа себеплик этеди. Къазахстанны халкъларыны ассамблеясында къарачай-малкъар диаспора да ишлейди. 5 жылымдан башлап миллет тепсеулерибизге юйреннгенме, кесибизни «Минги тау» ансамблибизде тепсей, кёп къыраллада болгъанма. Бери окъуна концерт программабыз бла келген эдик, «Балкария» ансамбль а бизде къонакъда болгъанды, - дейди Зарина.

Инсан быллай бир затны тутханлай, анга клиентле къуюлуп къаллыкъ тюйюлдюле. Бек алгъа ишинги тынгылы этип атынгы айтдырыргъа керексе. Сынам жыяр муратда, Зарина алгъа салонда ишлегенди. Акъырын-акъырын адамла аны юсюнден билгендиле, сёлешип, чакъырып башлагъандыла. Бирле хорлам угъай, къатышыу керекди дейдиле. Мен алай сунмайма, бош къатышып неда кенгден къарап тургъан ол мени жашау жоругъум тюйюлдю. Алчы болургъа, энчилигими кёргюзтюрге кюрешеме, дейди ушакъ нёгерибиз.   

Визажистге барыргъа къызла кёбюсюнде тойларыны неда башха магъаналы ишни аллында сюедиле. Аланы хазырлагъанда качестволу профессионал неда люкс косметика хайырланылады. Жангы келинни тойну аллында бояргъа бир сагъат кетиучюдю, былайда халат этерге жарамайды. «Алагъа керек болса, ишге солуу кюнледе да чыгъыучума. Багъаланы юслеринден айтханда, келинликлени 3.500 сомгъа бояйбыз, байрам ингирге уа - 2000 сомгъа. Былайда бу башхалыкъны сылтауун ангылатыргъа сюеме: хайырланылгъан косметика барысы да игиди, багъалыды, учузун алгъан да этмейбиз. Алай келинликлени бек багъалы «Аrmani», «Gerlain» дегенча люкс косметика бла бояйма, аланы мындагъы тюкенледен алмайма, тыш къыралладан келтиреме. Кисточкаларыбызны багъалары 5-6 мингден озгъан окъуна этеди. Сёзсюз, аллай макияжны багъасы учуз болур амалы жокъду», - дейди ол.

Макияжны аллында тиширыу бетин хазырларгъа керекди. Адамны териси къургъакъ неда асыры жаулу болса, къыйыныракъ тюшеди, кремле жагъып жумушатыргъа, тазаларгъа керекди. Кёзге кёрюннген кемчиликлени уа студияда кетередиле. Адамны бетин боягъанда анга тазалыкъ, женгиллик берирге, бояу аз болгъанча кёргюзтюрге, жашыракъ этерге кюрешебиз. Клиентлерибиз да, артда сагъатны кюзгюле аллында туруп, суратха тюше мычысала, ишибизге ыразы болсала, биз да ырахатлы болабыз, къууанабыз. Келинлик сюйген макияж анга ушамазлыгъын кёрсем, жашырмай, санга былай этсек иги боллукъду деп айтама. Тапсыз этилген макияж адамны ариу жерлерин букъдуруп, кемчиликлерин а бютюн туура этеди, деп белгилейди ол.   

Кёпле визажист аланы юйлерине келип ишлесе сюедиле. Алай студияда бу жаны онгла игирекдиле, анда жарыкъды, уллу кюзгюле салыныпдыла. Алгъа боялыргъамы, огъесе причёска этергеми тапды деген соруугъа уа жууап былайды: суу, лак чачылгъанда ол бетге жангылмазча, ыз къоймазча макияждан алгъа прическа этилсе игиди. Адамла тюрлю-тюрлю боладыла. Бирле жарыкъдыла, этгенинги жаратадыла. Башхаланы уа не бек кюрешсенг да, кёллерине жеталмайса. Аллай клиентле бла байламлыкъла тохташдыргъан къыйын да болур, алай Зарина ишинги тынгылы билсенг, къолларынг къалтырамай, ишекли-арсарлы болмай этсенг, не къыйын адамны да кёлюне жетериксе эм ол санга дагъыда къайтып келликди, дейди.

Студиялада аслам адамны бояугъа хайырланылгъан кисточкаладан бир-тюрлю ауруу жугъармы демеклик да сагъайтады. Болсада мында аланы хар бирин жууадыла, энчи растворла бла дезинфекция этедиле, хар клиентден сора битеу инструментле тазаланадыла. Специалистле ишлерин башлагъынчы, келген адам кёре тургъанлай къолларын жууаргъа, тазаланнган инструментлерин ачаргъа борчлудула. Биреуге жакъгъан помаданы башхагъа жакъмайдыла, алай бла герпес окъуна жукъдурургъа боллукъду. Мында багъалыланы аладыла, аланы тюбикден чыгъарып, кисточкала бла жагъадыла. Кёз косметикагъа уа андан да бек сакъдыла.

Зарина, визажистлени мектебин ачып, жангы специалистлени да хазырлайды. Аны ючюн Голландияда Амстердамда «make up» студияда окъугъанды, преподаватель иш бла кюреширге эркин этген документни алгъанды. Аны сохталарына курсладан сора авторский сертификат бла халкъла аралы диплом бериледиле. Эки курс барды: «базовый» эм «кеси кесиме визажист». Экинчисине выпускникле юйретедиле. Биринчисин а Зарина кеси бардырады, анга бир кесек теория (визажда ол артыкъ бек керек тюйюлдю, сора сюйген теория жаны бла билимин Интернетни юсю бла толтураллыкъды) киреди, аслам заман а практикагъа бериледи. Курс 13 кюнню тюшде онекиден ингирде алтыгъа дери барады.

Харкюнлюк макияжны этгенде уа къаллай косметиканы хайырланыу игиди деген соруугъа, Зарина былай юйретеди: «Мен хар заманда да айтама, косметика багъа болмагъанлыкъгъа, аман тюйюлдю деп. Сёз ючюн, тушьну, подводканы, помадаланы, карандашланы Max Faktor, ЕVA, Loreal, Mаybelline дегенча артыкъ багъа болмагъан фирмаладан алыргъа жарарыкъды, ала бетге, териге заран келтирлик тюйюлдюле.  Алай кремле, пудрала, тональныйле уа багъалы брендледен, юлгюге, Chanel, Dior, Gerlain дегенча фирмаладан болсала игиди. Аланы терини керекли микроэлементле, витаминле бла жалчытхан, кюнню заранындан сакълагъан комплекслери бардыла, кеслери да бетни къартайтмай, жашлыгъын сакъларгъа болушурукъдула».