Тынчлыкълы юйюрню насыбы

Бу кюнледе Огъары Малкъар элни администрациясыны  башчысы Табакъсойланы Кемал кёп сабийли  юйюрню таматасы  Гадийланы Мутайны жашы Азнауургъа бла аны юй бийчеси  Аминатха эсде къаллыкъ битеуроссей саугъаны – «Сюймеклик эмда бир бирге кертичилик» деген майдалны бергенди.

Тынчлыкълы юйюрню насыбы… Ол башхаланы кёзлерине  артыкъ бек кёрюнмейди. Хар юйюрню да насыплы жашауларыны жашырынлыкълары  энчидиле.  Ала  къыркъ жылны бирге жашап, бир бирге билеклик эте, бир бирни ангылай  келген Гадийланы юйюрде да  бардыла. Юйюрде тамата атады. Аны айтханына тынгылайдыла, ол не заманда да  оюмлу,  басымлы сёлешеди. Аналары уа от жагъаны жылыуун сакълагъан тиширыуду.  Бир бирге болушлукъ, билеклик этиу а бу  юйюрде  хошлукъну, монглукъну, огъурлулукъну   ёзегидиле.

Азнауур, Аминат да  ишчи адамладыла. Юйюр тамата  ол жерли «Совет Малкъар»  совхоз жокъ болгъунчу анда ишлегенди. Аминат а  кийим тикген цехде уруннганды.  Къаллай ишни тамамласала да,  ала анга кёллери бла берилгендиле, тынгылы, башхала айып салмазча  этерге кюрешгендиле.

Бу юйюрде жети сабий ёсгенди: Жамиля, Ариука, Жаннет, Аслан, Мадина, Индира эм Казбек. Ала бары да  бийик билим алып,  бирер жерде ишлеп,  кеслерине, жамауатха да хайыр келтире, башларын тутадыла,  балала ёсдюредиле. Ала да, насыпха, онеки боладыла.

Гадий улу Азнауурну  жаланда битеу  Малкъарда танып къоймай, районда, ол угъай да, республиканы хар къалайында да  биледиле, ол не заманда да жарыкъ, лакъырданы, чамны сюйген адамды. Аны тойлада, къурманлыкълада да кёрюрге кёпле сюедиле. Ол малкъар адет-тёрелени уста биледи, кёлден  кёп алгъышланы айтады. Аны тойлада тамата болургъа да уллу ыразылыкъ бла  чакъырыучудула.  Аллах бу юйюрге аллай жарыкъ кюнлени  элпек берсин.