Тамблагъы кюннге ышаныулукъну кючлеу – аны баш мураты

Арт кезиуде аскер вузлагъа кирирге сюйгенлерибиз, бу ызда жетишимли болургъа излегенлерибиз кёпден-кёп бола баргъанлары  ышандыргъан, кёллендирген да этеди.  Аллайларыбызны бириди РФ-ни  миллет гвардия  аскерлерини 546-чы полкуну аскер къуллукъну жалчытыу ротасыны связь эмда  информациялы технологияла взводну командири  Чочайланы Зейтун да.

Ол узакъ эм ариу эллерибизден биринде – Бызынгыда – аппасы Татыуну бла  ыннасы Толгъурланы Жамийни жомакъларына, таурухларына  тынгылай, аллай огъурлу, хурметли да  къартланы  къатларында  таматалагъа намыс-сый берирге, юйде къайсы этилирге тийишли  жумушну да тамамларгъа тюшюне ёсгенди.

Чочайланы юйюрлери Нальчикге кёчгенден сора уа жаш мында ючюнчю номерли гимназиягъа жюрюгенди. Тарыхдан, физикадан, обществознаниядан дерслени айырып сюйгенди. Орус тилни  грамматикасын иги билгенин,  халатсыз жазгъанын да  устазлары белгилегенлей тургъандыла. Алай болмазгъа уа амал да жокъ эди -  анасы Аслижан Алимовна,  шахарыбызда  таныулу педагог, биринчи номерли интернат-школгъа  жюрюгенлеге бу предметден дерсле берип,  жетишимли болгъанлай келеди.

Алай эсе да, Зейтун аскер форма киерге сюйгенди. Ол  мурат бла Бабугентде орналгъан экинчи   номерли кадет школ-интернатха  документлерин  жыйышдырып  берирге тийишли  сынауладан да ётюп, анда  билим алгъанды. Бу мектепде окъугъан  кезиуюнде да  предмет, спорт жаны бла да  конкурслагъа, олимпиадалагъа  къатышханлай тургъанды.

Алай бла жетишимлерине тийишлиликде спортну мастерине кандидат да болгъанды. Малкъар тилден бла адабиятдан устаз Башийланы Зухура Эрменбиевнаны башчылыгъында  чыгъармачылыкъ эришиуге  къатышып,  кёчгюнчюлюкню юсюнден видео халда хазырлагъан хапары ючюн  саугъаланнганды.

Кадет болгъан кезиуюн эсгере, юйретиучюлени  барысына да, алагъа жаланда класс башчылыкъ угъай, эгечлик да этип  тургъан педагог Бёзюланы Жансурат Мухарбиевнагъа, бирсилеге да ыспас этеди. Школну жамауат ишине тири  къатышхан, окъууда да жетишимли болгъан  жашны атасы Хызыргъа бла анасы  Аслижаннга дайым да КШИ-ни администрациясы ыразылыгъын  билдиргенлей тургъанды.

Интернат-мектепни  жетишимли тауусуп, Санкт-Петербургда СССР-ни маршалы Семён Будённый атлы Связьны аскер академиясыны кёп каналлы телекоммуникациялы системала (МТС) факультетини темир  чыбыкълы (проводной) связьны  системаларын хайырланыу эмда кийириу  специалистине окъургъа киреди.

Алай а вузну  кесини ичинде бериллик экзаменлени да тынгылы  бергенликге, мында жаш адамланы  бир айны ичинде башха тюрлю да  сынайдыла – эм алгъа аланы  къыйын аскер болумлагъа  эмда низамгъа чыдамлылыкъларын,  тёзюмлерин. Жарсыугъа, аланы кётюралмай, кетип  къалгъанла да  болгъандыла.

Таулу жаш а, жюрек  сайлаууна кертичилей къала эмда ата-анасыны, бирси жууукъларыны да ышанмакълыкъларын  алдамай, аллында салыннган борчладан ётгенди.  Биринчи кезиуде къайсы окъууда да  тынч тюйюлдю,  курсантлагъа да алай. Аланы бош заманлары да  аз болады. Алай а Чочай улу  спорт бла  кюрешгенин бир заманда да  къоймагъанды. Андан сора да,  ол китап окъургъа, усталыгъы бла байламлы литератураны да  сюеди.  Автомобильле бла байламлы  ангылаууна уа ким да   сукъланырчады. Бу жаны бла ол кёплеге болушлукъ этгенлей келеди.

Къадары алай къуралып, бюгюнлюкде жаратхан иши бла  кюрешгенине ыразыды. Анга  академияда да кёз-къулакъ болгъанлай, ёз  сабийлеринеча  къайгъыргъанлай  тургъанланы барысына да ыспас этеди.  Анда уа хар къайсы педагогун да кесини  къадарында бир  энчи  тюбешиунюча кёреди. Аланы хар  къайсысындан да кёп затха тюшюне, жашаугъа кёз  къарамы да  кенгергенин айтады.

Аны  муратларындан бири  уа  тамблагъы кюннге  ышанмакълыкъны кючлеудю. Ол хар заманда да  болгъанлай турса сюеди. Жашауда кеслерини билимлерине,  окъууларына ышаннганланы, ишлеринде  профессионал даражагъа  жетгенлени  жаратады эмда хурметлейди.  Жамауатны алгъа элтирикле ала болгъанларына толусунлай  ийнанады.

Зейтун сагъынылгъан академияны былтыр жетишимли тауусханды.  Диплом ишин  сегизинчи майда  къоруулап, офицер погонлагъа да тийишли болгъанды. Алайдан а аны Челябинск областьха Екатеринбург тийресине огъарыда  сагъынылгъан полкга  ашыргъандыла. Алай бла ол бюгюнлюкде анда взводну  командириди эмда къуллугъун бет  жарыкълы толтурады.

Кертиди, таулу жашны усталыгъы бла байламлы жолу алыкъа энди башланнганды. Алай эсе да,  ол, тутхан ишинде жетишимли болуп,  барыбызны да  къууандырыр деп ийнанабыз. Аллай  жашларыбыз, къызларыбыз бла да  ёхтемлене,  ала  миллетибизни атын иги бла  айтдырлыкъларына, аны  айнытырыкъларына да  ышанабыз.

Кимден да бег а аны халкъына жарарыкъ адам болурун  аппасы Керменланы Алим  сакълайды эмда сюеди. (Жарсыугъа, бирси къартла энди дунияларын  алышхандыла). Туудугъу да, солуугъа келген кезиую болса, эм алгъа аны  жокъларгъа, кёлюн алыргъа  ашыгъады.  Сёлеширге заман тапса да, аны  къалайлыгъын  соргъанлай турады.

Шахарда ёсюп, узакъ жерледе окъугъан, билим алгъан, ишлеген да жашны малкъар тилде иги  сёлешгенин да  белгилемей  къоялмайбыз. Нек дегенде ол бизни  бюгюнлюкдеги  жарсыуларыбыздан бириди.  Аны ючюн а тауча айтханларын  эшитсенг, жаш тёлюбюзню, ол, айхай да, жюрегибизге  хычыуунду,  кёлюбюзню да  кётюреди.

Жашауда шуёхлукъ  жюрютюуню да Зейтун къадарны бир насыбына  санайды. Кесини биргесине бу ызда окъугъан Ахмедланы Рамазан,  Насталаны Расул да бир бирлерине сакъ болгъанлай, къайгъыргъанлай  турадыла.

Къайда да белгиленнген,  айырмалы болгъан жаш тёлюбюз бла  ёхтемленнген бизни барыбызгъа да хычыуунду. Не  жашырлыгъы барды, кесим демегенни эки эрини бирге  жетмейдиле деп, буруннгулуларыбыз бошдан айтхан болмазла. Аны ючюн а ариу  къылыкълары, низамлары, ачыкъ ниетлери бла да бюгюнлюкде къалай айтыла  эселе да, тамблагъы кюнде тутхан ишлеринде бийик  профессионал даражагъа жетишип,  барыбызны да  къууандырырла деп ышанабыз.