Аграр университетни келечилери АПК-да жангы затла къурагъанланы санында

Бу кюнледе Ставрополь шахарда «Агроуниверсал-2019» деген тёрели агропромышленность кёрмюч эмда «АПК-да илму-техника прогрессни эм магъаналы проблемалары» ат бла халкъла аралы илму-практика конференция бардырылгъандыла. Аланы ишине Къабарты-Малкъар къырал аграр университетни механизация эмда предприятияланы энергия бла жалчытыу факультетини келечилери да къатышхандыла, деп билдиргендиле вуздан.

Бу ишни къурагъанланы къауумуна КъМКъАУ-да киреди. Аны бла бирге анда: Ставропольну къырал аграр, Чехияны бла Къазахстанны агротехника, Арменияны миллет аграр, Белоруссияны къырал аграр техника университетлерини, Минск (Беларусь Республика) шахардан тракторла чыгъарыучу заводну эмда Германиядан «NEUERO. Farm und Fördertechnik» эм «Рetkus technology» компанияланы келечилери къатышхандыла. Къонакъланы санында Ставрополь, Краснодар крайладан, Ростов областьдан, Шимал Кавказны республикаларындан, башха регионладан къырал власть органланы къуллукъчуларын да кёрюрге боллукъ эди.

Кёрмючде кёп тюрлю сферала эмда темала бла байламлы экспозицияла кёргюзтюлгендиле. Ол санда  тракторла, автомобильле, эл мюлк машинала, энчи техника эмда алагъа керекле, отлукъ эмда башха материалла, ветеринар препаратла эмда оборудование, мал ашла, семиртгичле, урлукъла эм кёп тюрлю башха затла. Агропромышленностьда хайырланыргъа боллукъ технологияланы арасында уа малчылыкъ продукцияны жарашдырыу, битимлени терк ёсдюрюу эмда аланы къоруулау, аш-азыкъ хазырлау, къурулуш бардырыу, энергияны аяу амалланы юсюнден билирге онг болгъанды. Талай компанияла эл мюлк бла байламлы финансла, связь, страхование эмда информатизация технологияларын туура этгендиле.

КъМКъАУ-ну келечилери анда аслам жангычылыкъла кёргюзтгендиле, аладан онбири ючюн дипломлагъа тийишли болгъандыла.