Бараклада тургъанла эски юйлени кетериу жанлыдыла

Нальчик шахар округну жер-жерли администрациясы «Ара» районда планировканы проектин жамауат сюзюуге чыгъаргъанды. Аны бла байламлы жыйылыу бу кюнледе болгъанды, деп билдиргендиле мэрияны пресс-службасындан.

Бу проект сагъынылгъан районда Шогенцуков, Толстой, Ногмов эмда Кабардинская орамла бла чекленеди. Аны ахыргъы планировкасы 1988 жылда этилген эди. Ол кезиуде бу тийреде кёп фатарлы юйле ишлерге мурат болгъанды. Алай андан бери аслам заман ётгени себепли проектни жангыртыргъа тюшгенди. 

Сюзюуге чыгъарылгъан жангы планировкагъа кёре, эски юйлени кетерип, жангы, кёп фатарлы журтла сюерге умут этиледи. Ол тийреде дагъыда адамла солурча зона, сабийлеге ойнарча майданчыкъла къураллыкъдыла. Аны бла бирге машиналаны салырча жерле жарашдырыллыкъдыла, транспорт инфраструктура да тап халгъа келтирилликди.

Жыйылыугъа шахарчыла, къурулушну бардырлыкъ организацияланы келечилери да къатышхандыла. Аны хайыры бла адамланы кеси оюмларын ачыкъ айтыргъа, соруула да берирге онглары болгъанды. Тап юйледе жашагъанла проектге ыразы болмагъандыла, бараклада тургъанла уа аны дурус кёргендиле. Экинчилерини саны иги да кёп болгъаны себепли планировканы проекти къабыл этилгенди.
 

 

Улбашланы Мурат
Поделиться: