Хар къайда да алда

Акъ-суучу Геляхланы Музафар  каратени киокушинкай тюрлюсюнден   алгъаракълада   Алма-Атада бардырылгъан дунияны чемпионатында,  75 килограммгъа дери ауурлукъда кюрешип, доммакъ майдалгъа тийишли   болгъанды. Таулу жаш ары дери да  тюрлю-тюрлю  магъаналы эришиулеге къатышханды, алчылыкъны да алып тургъанды. Къазахстандагъы чемпионатха уа  кёп къыралладан  бек кючлю спортчула къатышханларын эсге алсакъ, анда алыннган белгини бек сыйлыгъа санаргъа боллукъду.
Музафар   карате  бла  алты жылындан  бери кюрешеди. Биринчи тренери Болатланы Байрым болгъанды. Заман  да оза, жаш да къарыу ала,  жетишимлерине да къоша баргъанды. Ол 15-чи номерли орта школну да тауусуп, Къабарты-Малкъар къырал аграр университетге  киргенди. Анда да спортну къоймагъанды. Аны бла бирге уа окъууну да иги бардырады.  
Музафарны  жарау эте тургъанын дуния чемпионатлада бир ненча кере хорлагъан Мурат Думанишев кёрюп,  "Купол" спорт залгъа   чакъырады. «Ары арсарсыз кетгенме. Нек дегенде Акъ-Сууда спорт залда  асламында сабийле жарау этедиле. Манга уа усталыгъымы ёсдюрюр ючюн,  тенглерим керек эдиле.   Мурат да манга жашынача сакъды.
Тюзюн айтсам,   гитчелигимде, аммам сау заманда  сюе эдим, чемпион болуп, аны къууандырыргъа. Алай ол  ауушхандан сора уа мени аллай сейирим азайгъан эди. Болсада спортну уа къоймагъанма», - дейди Музафар.
Кюнле, айла оза баргъанлары бла  жашны  усталыгъы да ёседи. Ол  республикада, андан тышында да  белгили спортчула бла  тюбешип, аланы жарауларына къараргъа да онг табады. Алай бла   магъаналы  эришиулеге да команданы  санында терк-терк къатыша башлайды, мор бетли бел баугъа да тийишли болады. Ол жетишимле аны кёллендиредиле, гитчелигинде  этген  мураты да эсине терк-терк келип башлайды. Жашны Россейни каратеден жыйымдыкъ командасына да  аладыла, сагъынылгъан дунияны чемпионатына да  чакъырадыла.
Музафар  университетни жамауат ишине да  къатышыргъа да жетишалады. Илму иш бла да кюрешеди. Алагъаракълада ол  факультетде бардырылгъан илму конференцияда кесини докладын окъугъанды. Анга тынгылагъан жууаплы адамла бийик багъа бергендиле.
Сёзсюз, узун бойлу, тизгинли, чырайлы жашны тенглерини араларында да даражасы бийикдеди. Къазахстандан къайтханда биргесине  окъугъанла, преподавательле да анга жарыкъ тюбегендиле, андан да уллу жетишимле тежегендиле. Атасы  Геляхланы Залимге бла  анасы Жаннагъа къармашхан, ариу къылыкълы жаш ёсдюргенлери ючюн   ыспас этгендиле.

Холаланы Марзият.
Поделиться: