«Тепсеу - мени жашаууму жарыкъ эмда къууанчлы этген искусстводу»

Нёгерлерини кёбюсюча, ол да сабий заманында тепсеп башлагъанды. Бек алгъа «Балкария» ансамбльни  «Асса»  къауумунда юйреннгенди. Артда уа ол Улбашланы Мутайгъа тюшеди.

-Ол тепсеуню  патчахы эди, сейирлик адам, тауушлукъ педагог, бизни хар бирибизни да жюрегибизге жол таба билгенди. Жыл саны иги да уллайгъанлыкъгъа, чархы, саны, жюрюшю бла да жаш адамладан башхалыгъы жокъ эди,-деп эсгереди  Гуртуланы Лейля.

Къыз онбиринчи классха ётгенинден сора маэстро Лейляны, аны тенг къызларын да «Балкарияда» тепсерге чакъырады. «Манга энчи тепсеулени –сольный номерлени - ышанырла деп эсимде да болмагъанды»,-дейди Лейля. Алай жашау бир жерде тохтап турмайды: эки  жыл да  озгъунчу,  ол ансамбльни солисткасы болады.

Бир балеринаны былай айтханы эсиме келеди: «Хореография ол «жаханимди», тохтамагъанлай кесинги чархынга къыйынлыкъ сынатып турууду».  Алай Лейля уа алай сунмайды. «Ол аллай искусстводу – мени  жашаууму жарыкъ эмда къууанчлы  этген»,-дейди.

«Балкария» фольклор-этнография къырал тепсеу ансамбль кёп жерледе, кёп къыраллада гастрольлада айланнганды. Къайда да анга жарыкъ тюбегендиле. Угъай, ала къарыусуз сёзледиле. Сахнадан иймей, битеу зал гюрюлдеп, адамла жерлеринден ёрге туруп, кёпге дери тохтамай, къаты къарс уруп, сахнагъа кёп кере  чакъырып, къайтарып- къайтарып тепсетгендиле.

Артистле Италияда, Японияда, Орта Азияда, Испанияда, Португалияда, Тюркде болгъандыла. Лейля тыш къыралладан биринчи  кере Италиягъа  баргъанды. Архитектурасындан сора да, бу  къыралда жашагъанланы ачыкълыкълары, ариу кёзден къарагъанлары, жарыкълыкълары сейир этдиргенди. «Японияда гастрольла да айтып болмазча бир аламат, таурухлу эдиле.  Концертлерибизге къараргъа келгенлени неден да бек бизни   кийимлерибиз тамашагъа къалдыра эдиле, тепсеулерибиз а, айхай да, аланы да озуп. Кюн бек алгъа  чыгъа  келген къыралда  жашагъанланы сабырлыкъларын, адет-тёрелери, культураларын Лейля бек жаратханды.

-Биз Токиода тургъанбыз, бир жол а бизни  къыралны буруннгулу ара шахары Киотогъа элтген эдиле. Анда кёрген затларыбызны сёз бла айтыргъа къыйынды. Анда храмла алай кёпдюле, биз аладан бешисинде болгъанбыз. Ол а ниет тазалыкъны, ариулукъну, хар зат да бир бири бла бир  тап келишгенлерини белгисиди. Халкъ алай кёп болуп тургъанлай, шошлукъ  сейир этдиреди,- деп эсгереди Лейля.

Жарсыугъа, Лейля, саулугъуну сылтауу бла тепсеуню къойгъанды, алай сахнадан а кетмегенди. «Балкария» ансамбльни концертлери бардырады.       Лейляны бош заманы азды, аллай кезиу чыкъса уа, окъургъа сюеди. Ол сюйген авторла уа Александр Пушкин, Омар Хайям, Гарсия Лорка, Анна Ахматовадыла.