Азланы хатасы кёплеге жетеди

Жашауда кёп тюрлю хата-палахланы сылтауун адамла власть органла, коммунал службала, къурулушчула неда правону къоруулаучула тап ишлемегенлеринден кёредиле. Алай аланы кёбюсю, ким не зат айтса да, бизни арабыздан жашагъан низамсыз, къылыкъсыз адамладан чыгъады. Аланы саны азды, алай жамауат алагъа абери айтмай, этген затларына тынгылап турса, кеслерин тюз сунаргъа, алай къылыкъсыз жюрютюрге эркин болгъанча ангылайдыла.

Бу суратланы Майский шахарда 5-чи номерли орта школну спорт майданында алгъандыла. Кимле эселе да ары кирип, сабийле баскетбол ойнаучу затны жерге аудургъандыла. Аны бла тынчаймай, бир-бир жерлерин сирнек къабындырып кюйдюрюрге да кюрешгендиле. Андан сора да майданчыкъны тийресинде кир-кипчик тёгюп кетгендиле. «Аны битеу кимле этгенлери белгисизди. Табылсала уа, бек игиси - салгъан хаталарын кеслерини бохчаларындан тёлеп жабарча этерге керекди. Ол майданчыкъда бош заманларын къуру сабийле угъай, ишлери-кючлери болмагъан тамата тёлю да оздургъанына ишеклик жокъду», - дегендиле Май районну жер-жерли администрациясында. Шахарчыланы уа быллай шартлагъа уллу кёллю болмазгъа чакъыргъандыла.

Улбашланы Мурат хазырлагъанды.