Федерал министр «Эльбрус» курортну туризм онглары бла шагъырейленнгенди

РФ-ни экономиканы айнытыу министри Максим Решетников Къабарты-Малкъарда болгъан кезиуде КъМР-ни Башчысы Казбек Коков аны «Эльбрус» курортну туризм онглары бла шагъырейлендиргенди эмда «Нальчик» курортну айнытыуну мастер-планын кёргюзтгенди.

Тюбешиуге РФ-ни къурулуш эмда ЖКХ министрини орунбасары Дмитрий Волков, РФ-ни Экономиканы айнытыу министерствосуну Шимал-Кавказ федерал округну социал-экономика айныууну департаментини директору Игорь Храновский,  «Курорты Северного Кавказа» АО-ну  генеральный директору Хасан Тимижев, Туризм жаны бла федерал агентствону башчысыны орунбасары Елена Лысенкова, «Россети Северный Кавказ» ПАО-ну келечилери да къатышхандыла.

Къонакъла Элбрусда хал бла шагъырейленнгенлеринден сора кенгеш бардырылгъанды. Анда курортну сау жылны ичинде хайырланыуну онглары сюзюлгендиле.  «2030 жылгъа дери  лыжалада учарча трассаланы 17 километрден 47 километрге  жетдирирге, солугъанлагъа жерлени да 4,2 мингнге дери кёбейтирге белгиленеди. Бир жылгъа миллиондан аслам туристни алыргъа мурат этиледи», - деп билдиргенди Хасан Тимижев.   

Максим Решетников а Элбрусда туристлени саны быйылны биринчи жарымында  2019 жылдан эсе 62 процентге, 2020 жылдан а 215 процентге ёсгенин уллу ыразылыкъ бла билдиргенди. «Курортну онглары уа андан да уллудула, - дегенди министр. - «Эльбрусну» 2023 айнытыугъа 8,6 миллиард сом бёлюрге белгиленеди. Ол ахчагъа жангы трассаладан 30 километрин жарашдырыргъа, отоуланы санын да 5 кереге кёбейтирге мурат этиледи. Дагъыда туризм эмда тау-лыжа инфраструктурагъа энчи иеледен 24 миллиард сом къошулур деп сакъланады. Аны ючюн а курортну айныуун тыйгъан баш сылтауланы кетерирге керекди». 

Кенгешде сёз  объектлени тыш инженер инфраструктура бла жалчытыуну юсюнден да баргъанды. Тийишли заявка  «Россети Северный Кавказ» ПАО-гъа жиберилгенди. Андан сора да,  къар юзюлюуден сакъланыуну, анга себеплик этерик затла ишлеуню амаллары сюзюлгендиле, тийрени тапландырыуну юсюнден да сёлешиннгенди.
Казбек Коков Къабарты-Малкъарда туризмни айнытыу тийрелеге Черек, Элбрус, Зольск, Чегем районла киргенлерин билдиргенди. «Саулай айтханда, регионну курорт-рекреация  инфраструктурасын айнытыуну баш мураты - кесибизде эмда тышындан келген туристлени санын ёсдюрюудю. Ол а ахырында инвестициялагъа ахшы онгла къураугъа, экономиканы игилендириуге, жер-жерлени тапландырыугъа, транспортну, халкъны жумушларын жалчытыуну аякъландырыугъа, жангы ишчи жерлени ачыугъа келтирликди», - деп чертгенди регионну Башчысы.