Казбек Коков Шимал-Кавказ федерал округну социал-экономика айныууна аталгъан кенгешге къатышханды

Бу кюнледе Пятигорскда РФ-ни Правительствосуну Председателини орунбасары Александр Новакны башчылыгъы бла уллу жыйылыу бардырылгъанды. Анга  РФ-ни Президентини СКФО-да толу эркинликли келечиси Юрий  Чайка, РФ-ни экономиканы айнытыу министри Максим  Решетников, РФ-ни энергетика министри Николай  Шульгинов, РФ-ни къурулуш эмда жашау журтла-коммунал мюлк министри Дмитрий Волков, округну регионларыны башчылары да къатышхандыла. 

Кенгешни баш магъанасы   РФ-ни Правительствосуну Председатели Михаил Мишустин, 15 июньда Пятигорскда СКФО-ну социал сферасын бла экономикасын айнытыу жаны бла правительстволу комиссиясыны жыйылыуун бардыргъанда берген буйрукъланы толтуруугъа себеплик этиудю. Шимал-Кавказ федерал округну регионлары, РФ-ни Экономиканы айнытыу министерствосу хазырлагъан методикагъа таянып, регионларын 2030 жылгъа дери айнытыуну мадарларын жарашдырыу жаны бла ишлерин бошай турадыла. Шимал Кавказны алгъа элтирик кючге уа туризм саналады.

Александр Новак   Шимал-Кавказ федерал округну 2035 жылгъа дери айнытыууну жангы программасы жарашдырылгъанын, анга правительство къарай тургъанын билдиргенди эмда ол быйыл окъуна къабыл этиллигине ышандыргъанды.  Максим Решетников а СКФО-ну субъектлерини тутхучлу ёсюулерини амаллары бла шагъырейлендиргенди. «Магъаналарына кёре, ала регионлада инвестициялагъа онгла къурауну, экономикаларын кётюрюуню «жол карталарыдыла». Биз СКФО-ну субъектлерин айнытыуну амалларын комплекс халда жарашдырабыз», -дегенди министр.

Ол ЖКХ-да болумгъа энчи эс бургъанды: «Бу бёлюмде низам салынса, халкъны жумушла бла жалчытыу игиленмей къаллыкъ тюйюлдю, инвестициялагъа да жангы онгла ачыллыкъдыла, ишчи жерлени саны да ёсерикди. Нек дегенде, ЖКХ-ны жумушларына сурам бек уллуду, кёп башха бёлюмлени халлары да ма анга кёре боладыла», - дегенди.
Юрий Чайка СКФО-ну регионларыны экономика онглулукъларын кётюрлюк баш кюч туризм болгъанын эсгертгенди.  «Мында да инвесторлагъа ахшы онгла къурауну магъанасы уллуду. Жаланда курортланы бир жерде да болмагъан багъыу эмда саулукъландырыу амалларын аяулу хайырланыргъа, аланы келир тёлюлеге сакъларгъа тийишлисин унутмазгъа керекди»,- деп чертгенди полпред.

Жыйылыуда Казбек Коков да сёлешгенди эмда  Къабарты-Малкъарда экономиканы айнытыуну амалларын жарашдырыу иш къалай  баргъаныны юсюнден айтханды. «Регионну  2030 жылгъа дери айнытыуну  белгиленнген мадарларына  300  миллиард сомгъа 64 инвестпроект киреди. Ала 22 мингден артыкъ ишчи жер къураргъа, алай бла уа ишсизликча къыйын проблемадан къутулургъа онг берликдиле»,-дегенди.

Республиканы Башчысы бизнесни себеплиги бла бардырылгъан проектлени юслеринден да айтханды. Аланы арасында  курорт тийрелени айнытыу, уллу  теплица комплексни ишлеу, вольфрам-молибден магъаданны къазып башлау да бардыла. «Тергеулеге кёре, ич регион продукт 2030 жылгъа эки кереден асламгъа ёсерикди.  Налогладан а 2030 жылгъа 80 миллиард сом жыяргъа мурат этебиз. Аланы ёлчеми  бюгюнлюкде 15 миллиард сом чакълы бирди. Ёсерге республиканы онглары, резерви да бардыла», - деп къошханды ол.
Къабарты-Малкъарны оноучусу специалистлени хазырларгъа да республиканы кючлю билим бериу мурдору болгъанын да эсгертгенди. Андан сора да, урунуу халланы ачыкъ этиуню амаллары сюзюледиле. Алай этилсе, НДФЛ жаны бла къошакъ файда тюшюрюрге онг чыгъарыкъды.

- Бир ишчи жерде иш хакъны ёсюую 2030 жылгъа 35 процентни тутаргъа керекди. Алай ол бизге азлыкъ этеди, аны себепли биз ёсюу атламланы терклендирир муратлыбыз. Кёп болмай бюджет бёлюмде ишлегенлени хакъларын 10 процентге кётюрюрге оноу этилгенди. Айлыкъны 2022-2023 жыллада да кётюре барыр умутубуз барды. Бюджетни проекти да ма аны эсге алыу бла жарашдырылады, - деп билдиргенди Казбек Коков.

КъМР-ни Башчысыны бла Правительствосуну пресс-службасы.
Поделиться: