Урлукъгъа жараулу нартюхню ёсдюрюуге къарайдыла

«Россельхозара» къырал учрежденияны Прохладна районда бёлюмюню специалистлери нартюхню гибрид тюрлюлери сегиз жюз гектардан аслам жерде ёсдюрюлген жерни тинтип чыкъгъандыла кёп болмай. Аланы бизни республикада «Отбор» предприятияда жарашдыргъандыла.

Андагъы гибридле быладыла: Родник 179 СВ, Родник 180 СВ, Родник 292 МВ, Агата СВ, Диана МВ, Прохладненский 175 СВ, Прохладненский185 СВ, Северина, Этна, Берта эмда Вилора. Ала бары да селекция жетишимлени Къырал реестрине тюшгендиле.

Нартюхню бу урлукъларын асламысында Россейни ара регионларына, ол санда Башкирияда, Татарстанда ёсдюрюрге болады. Беларусьда, Къазахстанда, Узбекистанда да барды алагъа сурам. Ала силосха жарайдыла, бираз мирзеуге да бёлюрге болады. Биринчисинден гектар сайын 480-520 центнер алыргъа боллукъду. Мирзеуню юсюнден айтханда уа, бир гектардан – 50-80 центнер чыгъады.

Дагъыда сагъынылгъан гибридледен Этна ФАО 600 бла Диана бизни къыралда къыбыла регионлада да битерикдиле. Аладан силос этерге, мирзеу алыргъа да боллукъду.

Башында сагъынылгъан тийреледе гибридле жетселе, гектар сайын 50-60 центнер урлукъ жыяргъа боллукъду. Илму учрежденияны специалистлери быйыл алада контроль халда тинтиулени юч кере бардыргъандыла. Аз кечирек, тирлик жыйыу башланса, нартюхню оруп, мычымай заводха жиберликдиле. Анда уа урлукъчулукъ бла кюрешген специалистле производствогъа тохтаусуз контроль этип турлукъдула.

Улбашланы Мурат хазырлагъанды.
Поделиться: