Чалмасха ток тартылгъанды

«Россети Шимал Кавказ» компания Элбрус районда Чалмас деген элни ток сетьлеге къошханды. Чалмасны юсюнден архивледе биринчи кере 1890 жылда сагъынылады. Бу эл тенгизден 1300 метр бийикликдеди. Таулу халкъны Орта Азиягъа кёчюргенлеринден сора атылып тургъанды. Ол кезиуледе анда юйлени оюп, ташларын, башха затларын да Тырныауузда къурулуш ишледе хайырланнган эдиле. Озгъан ёмюрню токъсанынчы жылларында уа 150 юйюрге анда жер юлюшле бергендиле. Алай коммуникацияла болмагъаны ючюн анда хазна абери ишленмегенди.

Быйыл а, энергетикле республиканы властьлары бла келишип, ол тийреде трансформатор подстанция орнатхандыла эмда 6 эм 0,4 кВ кючлю ызла тартхандыла. Ишлени барына да 6,3 миллион сом къоратылгъанды.

Аланы тамамлагъан артыкъ женгил болмагъанды, алай компанияны специалистлери иги къармашып, алагъа салыннган борчну жарыкъ бетли толтургъандыла. Энди уа ата-бабаларыны жеринде юй салыргъа, мюлк къураргъа, ууакъ производствола ачаргъа сюйгенле да чыгъып башлагъандыла.

«Компания этген иш бизге бек магъаналыды. Аны хайырындан Чалмас жангыдан къуралып башланырыгъына толу ийнанама», - деп чертгенди Тырныауузну башчысы Джаппуланы Руслан.

Улбашланы Мурат хазырлагъанды.
Поделиться: